මාසෙ පඩිය එන දවස් කිට්ටු වෙද්දි අපේ කට්ටියගෙ අතේ වැඩි පුරම තියෙන්නෙ බැංකු පොත. නැත්නම් ATM කාඩ් එකත් සාක්කුවෙ දාගෙන හවස 3, 4 වෙද්දි ATM මැෂින් එකක් හොය හොයා දුවනව. වෙන දේකට නෙවෙයි පඩිය වැටිලද කියල බලන්න. ඇයි ඉතින් පඩිය වැටුණු ගමන් කී දාහක් වැඩ තියෙනවද කරන්න. ඉස්සෙල්ලාම ලෝන් ගත්ත ඒව ටික ගෙවන්න ඕන. ඊට පස්සෙ ගෙදර බිල්. ඇයි ගෙදරට බඩු ගෙනියන්න සල්ලි ගන්නත් ඕනනෙ. තව.. වාහනයෙ ෆිනෑන්ස්, ලීසිං ටික. ඔක්කොමත් හරි හවසට යාළුවොත් එක්ක පොඩි ෆන් එකක් දාන්න ඕන වෙන ගාණත් ගන්න එපැයි.
ඇත්ත, ඔය හැම දේටම එක පාර සල්ලි අරන් ලඟ තියා ගන්න බෑනෙ. ඒත් හදිස්සියෙවත් ඕන වුන වෙලාවට ATM මැෂින් එක වැඩ කලේ නැත්නම්. සති අන්තයෙ දවසක වුනොත් නම් කපෝතියි. ඇත්තටම ඔය වැඩ ටිකත් ගෙදර ඉඳන්ම කරන්න පුළුවන් ක්‍රමයක් ඇත්තෙම නැද්ද?
තියෙනව. ඉස්සර වගේ නෙවෙයි. දැන් තාක්ෂණය සෑහෙන්න දියුණුයි. හොඳ ආරක්ෂාවක් ඇතුව පහසුවෙන් තමන්ගෙ බැංකු ගිණුම ජංගම දුරකථනයෙන් හසුරවන්න පුළුවන් ක්‍රම ගොඩක් දැන් තියෙනව. හැබැයි අවාසනාවට අපේ ගොඩ දෙනෙක් ඒ ක්‍රම පාවිච්චි කරන්නෙ නෑ. එක්කො ඒව පාවිච්චි කරන විදිය දන්නෙ නෑ. නැත්නම් ඒවා ගැන ලොකු විශ්වාසයක් නෑ.
ඉතින් මම හිතුවා මේ නොදැනුවත්කම නිසා සිද්ධ වෙන රස්තියාදුව අඩු කරගන්න මේ වෙද්දි ලංකාවෙ ප්‍රධාන පෙලේ බැංකු ගොඩකින් හඳුන්වල දීලා තියෙන Mobile Banking ක්‍රම ටිකක් ගැන ඔයාලට කියන්න.
-
SMS Banking
-
USSD Banking
-
Telephone Banking
-
Online Banking App.
-
Internet Banking (ලොකු විස්තරයක් ලඟදීම කියන්නම්)
ඇත්තටම මේවා අත්හදා බලන්න. වැඩ කටයුතු ටික හිතා ගන්නවත් බැරි තරමට ලේසි වේවි.
(සේවාවන් ගැන වැඩි විස්තර දැනගන්නයි ඒවා ක්‍රියාත්මක කරගන්න හැටි දැනගන්නයි ඒ ඒ බැංකු වල ඒ ඒ සේවාවෙ නම උඩ ක්ලික් කරන්න)
1. People's Bank
ස්මාර්ට් ෆෝන් එකෙන් SMS එකක් යවල හරි USSD කෝඩ් එකකින් හරි පටස් ගාලා ඔයාගෙ වැඩේ කරගන්න පුළුවන් ක්‍රමයක් මහජන බැංකුවෙ තියෙනව. මේ ක්‍රමය මුළු මනින්ම පෞද්ගලික වුනාට අවාසනාව කියන්නෙ SMS ක්‍රමය පාවිච්චි කරන්න පුළුවන් මොබිටෙල් පාරිභෝගිකයන්ට විතරයි. එතකොට USSD ක්‍රමය පාවිච්චි කරන්න පුළුවන් ඩයලොග් පාරිභෝගිකයන්ට විතරයි. මේ ක්‍රමයෙදි ලංකාවෙ ඕනම තැනක ඉඳන් ගිණුම් තොරතුරු දැනගන්න, ගණු දෙනු කරන්න, බිල් ගෙවන්න වගේ වාසි ගොඩක් ලබාගන්න පුළුවන්.
2. Commercial Bank
ගොඩක්ම පහසුවෙන් ගණු දෙනු ටික කරගන්න කොමර්ෂල් බැංකුවෙන් ගොඩක් ක්‍රම හඳුන්වල දීලා තියෙනව. මෙයාලගෙ USSD ක්‍රම පහසුකම ලැබෙන්නෙ එටිසලාට්, ඩයලොග් පාරිභෝගිකයන්ට විතරයි. හැබැයි SMS ක්‍රම පහසුකම නම් එටිසලාට්, ඩයලොග්, හච්, එයාටෙල් පාවිච්චි කරන හැමෝටම ලැබෙනව. කොහොම වුනත් මේ කාට කාටත් ගිණුම් විස්තර දැනගන්න, වාර්තා ලබාගන්න, බිල් ගෙවන්න, ගණු දෙනු කරන්න වගේ වැඩ ගොඩක් කරගන්න පුළුවන්.
ඔය ක්‍රම පහසුකම් දෙක හැරුණාම ඔයාගෙ ෆෝන් එකට ඩවුන්ලෝඩ් කරගන්න පුළුවන් ඇප්ලිකේෂන් එකක් තියෙනව Combank Online Banking කියල. ෆෝන් එක ඇන්ඩ්‍රොයිඩ් වුනත් ඇපල් වුනත් ප්‍රශ්නයක් නෑ. මේ ඇප්ලිකේෂන් එක ඩවුන්ලෝඩ් කරගත්තොත් නම් ගිණුම් විස්තර ලබාගන්න, බිල් ගෙවන්න, ගණු දෙනු කරන්න විතරක් නෙවෙයි ATM කාඩ්පත් හසුරවන්නත් පුළුවන්.
3. Sampath Bank
ඩයලොග්, මොබිටෙල්, එයාටෙල්, එටිසලාට් පාරිභෝගිකයන්ට අත්විඳින්න පුළුවන් SMS බැංකු ක්‍රම පහසුකමක් සම්පත් බැංකුවෙනුත් ලබාදීලා තියෙනව. ලංකාවෙ ඕනම තැනක ඉඳන් ගණු දෙනු ටික කරන්න වගේම ගිණුම් තොරතුරු ලබා ගන්නත්, චෙක් පත් හසුරවන්නත්, බිල් ගෙවන්නත් මේ පහසුකම හරහා ඔයාට පුළුවන්.
ඒ හැරුණාම ලෑන්ඩ් ෆෝන් එකෙන් කොල් එකක් දීලා ඔය වැඩ ටික කරගන්න පුළුවන් ක්‍රමයකුත් තියෙනව Tele Banking කියල. හැබැයි ඊට කලින් ලඟම තියෙන සම්පත් බැංකුවට ගිහින් ඔයාගෙ විස්තර දීලා රෙජිස්ටර් වෙලා ඉන්න ඕන. එහෙම රෙජිස්ටර් වුනාට පස්සෙ ඔයාට පුළුවන් ලෝකෙ ඕනම තැනක ඉඳන් ගණු දෙනු කරන්න. තව… ATM කාඩ්පත් හසුරවන්න, බිල් ගෙවන්න, චෙක් පත් හසුරවන්න වගේ වැඩ තොගයක් කරගන්නත් පුළුවන්.
සම්පත් බැංකුවෙනුත් ඇන්ඩ්‍රොයිඩ්, ඇපල් ස්ටෝර්ස් හරහා ෆෝන් එකට ඩවුන්ලෝඩ් කරගන්න පුළුවන් Mobile Banking ඇප්ලිකේෂන් එකක් හදල තියෙන්නෙ. මේ ඇප් එකෙන් කරගන්න පුළුවන් වැඩ අතරෙ ප්‍රධාන වශයෙන්ම තියෙන්නෙ ගණු දෙනු කිරීම, ATM කාඩ්පත් හැසිරවීම වගේ වැඩ තමයි.
Sampath Vishwa කියන්නෙ ෆෝන් එකෙන් ගිහින් වුනත් වැඩ ටික කරගන්න පුළුවන් Online Banking ක්‍රමයක්. එයාල නම් මේකට කියන්නෙ Electronic Banking කියල. කොහොම වුනත් ගිණුම් ආරම්භ කරන්න, ATM කාඩ්පත් හසුරවන්න, ගිණුම් තොරතුරු ලබාගන්න, ගණු දෙනු කරන්න, බිල් ගෙවන්න වගේ මාරම වැඩ තොගයක් මේ සේවාවෙන් ඉටු කරගන්න පුළුවන්.
4. Hatton National Bank
හැටන් නැෂනල් බැංකුවෙන් ලබා දීලා තියෙන SMS, USSD ක්‍රම පහසුකම් නම් ඕනම ෆෝන් එකක පාවිච්චි කරන්න පුළුවන්.
හැබැයි HNB Mobile Banking ඇප්ලිකේෂන් එක නම් ඩවුන්ලෝඩ් කරන්න පුළුවන් ඇන්ඩ්‍රොයිඩ්, බ්ලැක්බෙරි සහ ජාවා ෆෝන්ස් වලට විතරයි. මේ ක්‍රම පහසුකම හරහා නම් HNB පාරිභෝගිකයින්ට ලෝකෙ ඕනම තැනක ඉඳන් තමන්ගෙ ගිණුම් හසුරවන්න, ගණු දෙනු කරන්න, බිල් ගෙවන්න, චෙක් පත් හසුරවන්න වගේ වාසි ගොඩක් අත්විඳින්නත් පුළුවන්. මෙයාලගේ Mobile Banking පහසුකමේ තියෙන විශේෂත්වය තමයි අධික ආරක්ෂාව. එක එක වැඩ වලට එක එක passwords පාවිච්චි කරන්න පුළුවන් වගේ ආරක්ෂක ක්‍රම කීපයක්ම තියෙනව.
5. Seylan Bank
USSD ක්‍රම පහසුකම නැතත් SMS ක්‍රම පහසුකමෙන් වැඩ තොගයක් කරගන්න පුළුවන් විදියට තමයි සෙලාන් බැංකුව කටයුතු සලස්වල තියෙන්නෙ. ගිණුම් තොරතුරු දැනගන්න, ගණු දෙනු කරන්න, චෙක් පත් හසුරවන්න, ATM කාඩ්පත් හසුරවන්න, බිල් ගෙවන්න වගේ වැඩ ගොඩක් පටස් ගාලා කරගන්න පුළුවන්.
ඒ වුනාට සෙලාන් බැංකුව හඳුන්වල දීලා තියෙන Mobile Banking ඇප්ලිකේෂන් එකෙන් නම් ලොකු වාසියක් ගන්න බැරි පාටයි. ලෝකෙ ඕනම තැනක ඉඳන් ගණු දෙනු කරන්නයි බිල් ගෙවන්නයි වගේ වැඩ ටිකක් තමයි ප්‍රධාන වශයෙන්ම කරගන්න පුළුවන්.
6. Bank of Ceylon
අවාසනාවට ලංකා බැංකුවෙ නම් තියෙන්නෙ SMS ක්‍රම පහසුකම විතරයි. ඒ වුනාට SMS වලින් ගිණුම් විස්තර දැනගන්න, ගණු දෙනු කරන්න, බිල් ගෙවන්න වගේ අත්‍යවශ්‍ය වැඩ ටිකක් කරගන්න පුළුවන්.
හැබැයි මෙයාල හඳුන්වල දීලා තියෙන BOC Smart Gen ක්‍රම පහසුකමෙත් පොඩි වාසියක් තියෙනව පටස් ගාලා ගිණුම් ආරම්භ කරන්න පුළුවන් වගේ. ඒත් ලොකු ප්‍රයෝජනයක් නෑ.
7. National Savings Bank
ජාතික ඉතිරිකිරීමේ බැංකුවෙත් ලොකු වෙනසක් නෑ. එයාලගෙත් තියෙන්නෙ SMS ක්‍රම පහසුකම විතරයි. ඒ කෙනුත් ගිණුම් විස්තර දැනගන්නයි, ගණු දෙනු කරන්නයි, බිල් ගෙවන්නයි විතරයි පුළුවන්.
8. HSBC Bank
HSBC බැංකුවෙ නම් තියෙන්නෙ ඇන්ඩ්‍රොයිඩ්, ඇපල් ෆෝන් වලට එන Mobile Banking ඇප් එකක් විතරයි. SMS,USSD ක්‍රම පහසුකම් නෑ. ඒ වුනාට මේ ඇප් එකෙන් ගිණුම් විස්තර දැනගන්න, ලෝකෙ ඕනම තැනක ඉඳන් ඕනම තැනක් එක්ක ගණු දෙනු කරන්න, බිල් ගෙවන්න වගේම චෙක් පත් හසුරවන්නත් පුළුවන්.
9. Standard Chartered Bank
ඩයලොග්, එටිසලාට්, එයාටෙල් පාරිභෝගිකයන්ට අත් විඳින්න පුළුවන් SMS Banking ක්‍රම පහසුකම ස්ටෑන්ඩඩ් චාටඩ් බැංකුවෙනුත් ලබල දීලා තියෙනව. ඒ වුනාට ගිණුම් විස්තර දැනගන්න, ගණු දෙනු කරන්න, බිල් ගෙවන්න වගේ වැඩ ටිකක් විතරයි කරන්න පුළුවන්.
හැබැයි මෙයාලගෙ Phone Banking ක්‍රම පහසුකම නම් හරිම වාසි දායකයි. පැය 24 පුරාවට ක්‍රියාත්මක මේ පහසුකමෙන් ගිණුම් විස්තර ලබාගැනීම, බිල් ගෙවීම, ගණු දෙනු කිරීම වගේම චෙක් පත් හැසිරවීම වගේ වාසි අත්විඳින්න පුළුවන්.
කොහොම වුනත් ඔය ටික හැරණාම අපිට මග හැරුණු, ඔයාලා දන්න තව ක්‍රම සහ තොරතුරු අනිවාර්යයෙන්ම තියෙන්න ඕන. ඒ නිසා අපේ යාළුවන්ටයි අපිටයි දෙගොල්ලන්ටම දැනගන්න ඒවා කමෙන්ට් කරන්න නම් අමතක කරන්න එපා යාළුවනේ.
