බර්ගර් කඩනම් ඉතින් කොච්චරවත් අපිට පාර තොටේදි හම්බවෙනවනෙ. ඒත්.. ඒ අතරින් රු. 500, 600ට මස්, චීස් පිරෙන්න දාපු රස වෑහෙන බර්ගරයක් රස බලන්න හොඳම තැනක්.. ලේසියකට නම් හොයාගන්න බෑ. අන්න ඒ නිසාමයි අපිත් කල්පනා කලේ.. ළඟ ළඟම එන කොරෝනා දෙවනි රැල්ලෙ ලොක්ඩවුණ් එකට කලින්, ඔයාලට කියන්න..
අලුත්ම, සුපිරිම බර්ගර් කඩ ටිකක්.
1. The Food Cycle
බම්බ ගෝල් රෝඩ් එකේ තියෙන හොඳ සුවපහසු ප්ලේස් එකක්.. වගේම තමයි මෑතකදි අපිට හමුවුණු සුපිරිම බර්ගර් කඩයක්. කිව්වට.. මෙයාලා ළඟ බර්ගර් විතරක් නෙවෙයි, සබ්මැරීන්, කොත්තු අනං මනං ජාති ගොඩකුත් තියෙනව. කොහොමහරි ගෙදර හදන පදමට ලුණු, ගම්මිරිස් එක්ක තුනපහ අඩුම කුඩුම රසත් ලාවට තියෙන්න හදපු චිකන්, බීෆ් පැටි තමයි මේ බර්ගර්වලට එන්නෙ. ඉතින්.. ඒ වගේ පැටි එකක් එක්ක චීස් පෙත්තක් දෙකක්, ලූණු, තක්කාලි ටිකක් ගැළපිලා එද්දි, කොහොමද ඈ… අනික ගාණත් රු. 650ක් වගේනෙ.
2. Big Daddy's BBQ
අල්ලකට වඩා ලොකු, මස්වලින් පිරිච්ච චිකන් තයි එකක්, හොඳහැටි පදම් කරල චාකෝල් රස නූලට තියෙන්න ග්‍රිල් කරල.. බර්ගර් බන් එක මැදින් තියල, චීස්, මයොනිස් එක්ක ලූණු, තක්කාලි, සලාදකොළ සියල්ල තියල පොටැටෝ ෆ්‍රයිස් සමඟ මේසෙට. රු. 650 කෙචප් ටිකක් ගා ගත්තා කියන්නෙ ඉතින්.. යමරෙට ඇඹරෙන්නෙ. බොරුනම් ගිහිල්ල බලන්නකො, හෝකන්දර සමඟි මාවතේ පාර අයිනෙ තියෙන මේ ප්ලේස් එකට.
3. Thoma
රු. 400ට ටොප් බර්ගර් එකක් කන්න යන්න කොළඹ සෙන් ඇන්තනිස් පාරෙ තියෙන මේ ප්ලේස් එකට. ටිකක්.. සෝස්, මයොනිස් පැත්තට බර වුණාට මෙයාලගෙ බර්ගර් එක.. මැද්දට එන කටු නැති චිකන් කෑලි පොඩි කරල හදපු, ගැඹුරු තෙලේ පදමට බැදපු පැටි එක.. ලූණු, සලාද, තක්කකාලි සමඟ පොඩි චීස් පෙත්ත..
කටට රස ගෙනනව යාළු පංකාදු පහට!
4. Griddling (Street Rush)
මවුණ්ට් ස්ට්‍රීට් රෂ් එක ඇතුළෙ තියෙන හොඳම බර්ගර් ප්ලේස්වලිනුත් හොඳම එක කිව්වොත් හරි. විශේෂයෙන්ම මෙයාලගෙ මින්ස්ඩ් බීෆ් බර්ගර් එක, චිකන් බර්ගර් එක එහෙම. රු. 500-600 අතරෙ යන්නෙ. කියල වැඩක් නෑ.. හොඳහැටි ලුණු ඇඹුලෙ, කුළුබඩු රසත් ලාවට තියෙන්න පදම් කරල මස් ටික හීනියට ලියල කරල අරගෙන හදපු පැටි. ඒකත් ගැඹුරු තෙලේ බැදල, බර්ගර් එකට එද්දි ටොප් ඔම්ලට් එකකුයි, ලූණු පෙත්තකුයි, මයොනිසුයි මදි නොකියන්න..
ආයෙ ඉතින් ඒකෙන් එකක්, ෆ්‍රයිස් ටිකක් එක්ක දෙසාබෑවා කියන්නෙ..
5. Street Burger (Street Rush)
මෙයාල ළඟ තියෙනව නෝමල් පැටි බර්ගර්වලට එහා ගියපු යමක්. ඒ තමයි ග්‍රිල්ඩ් මීට් බර්ගර්. ටිකක් ගණන්, රු. 600න් උඩ වගේ. හැබැයි කටු රහිතව, බාබකියු රස ඇති හැටියට තියෙන්න හදාපු තඩි මස් පළුවක් චීස්, මයොනිස්, සලාද, ලූණුවලට මැදිවෙලා..
ෂැහ්, වැඩක් නෑ ඉතින් කියල. කාලම බලන්න ඕන, හ්ම්…
6. Chef Rooster
රු. 300 ඉඳන් උඩට, බර්ගර් තියෙනව කන්න හිතේ හැටියට. ප්ලේස් එක තියෙන්නෙ කොළඹ 12, අබ්දුල් හමීඩ් වීදියෙ. හැන්දෑවක් අල්ල ගියා නම්.. බර්ගර් විතරක් නෙවෙයි පංකාදු සබ්මැරීන් එකක් වුණත් රස බලන්න තිබ්බ. කොහොම වුණත් විශේෂයෙන්ම කියන්න ඕන මෙයාලගෙ චිකන්, බීෆ් බර්ගර් ජාති ටිකේ.. චීස්, මයොනිස් හැරෙන්න ඩෙවිල්, චිලි, ටොමැටෝ, ඇවකාඩෝ බේස් වෙන්න හදාපු.. මෙක්සිකන්, ග්‍රිල්ඩ්, ස්පයිසි, ෆ්‍රයිඩ් වගේ රසට ගළපපු මස් ඇති හැටියට දමාපු සුපිරිම බර්ගර් ටිකක් තියෙනව..
රස බලන්නම කියාපු, හොඳද.
