බ්‍රවුනි කිව්වාම සමහරුන්ට නම් එකපාරටම මතක් වෙනව ඇත්තෙ ගෙදර ඉන්න බල්ලව. ඒ වුනාට චොකලට් රසට ආදරේ කරන කෙනෙක්ට? ඔව්, අනිවා බ්‍රවුනි තමයි.
බ්‍රවුනි කියන්නෙ චොකලට් කේක් වගේම හැබැයි ඊට වඩා චොකලට් රසයෙන්, හයිය ගතියෙන් ටිකක් වැඩි කේක් ජාතියක්. අතුරුපස ගැන උනන්දුවක් තියෙන අයට නම් බ්‍රවුනි ගැන අමුතුවෙන් කියන්න ඕන නෑ. තනිකරම චොකලට් රසට හැදුණත් බ්‍රවුනි වල තියෙන තට්ටු තුනේ රස මැජික් එක තමයි දිව පිස්සු වට්ටන්නෙ.
ඉස්සෙල්ලම ටිකක් හයියට හැපෙන යටම තට්ටුව, බේක් වුනු චොක්ලට් රසයෙන් දිව පිස්සු වට්ටනව. ඊට පස්සෙ මැද්දට වෙන්න තියෙන ටිකක් මෘදු, චොකලට් රසයෙන් අනූන කේක් තට්ටුව, රස නහර පිනා යන රසක් තමයි ගේන්නෙ. ඊටත් උඩින් තමයි බ්‍රවුනි වල අනන්‍යතාවය තියෙන්නෙ. හොඳටම බේක් වුනු තුනී චොකලට් තට්ටුව. බ්‍රවුනි කෑල්ල හෙමිහිට හපද්දි උඩින්ම තියෙන තුනී චොකලට් තට්ටුව දිවට ගේන අපූරු ක්‍රිස්පි ගතිය! මතක් වෙද්දිදිත් කටට කෙල උනන ගාණයි.
හැබැයි ඉතින් බ්‍රවුනි කොච්චර රස වුනත් වැඩක් නෑනෙ, රසම රස බ්‍රවුනි කෑල්ලක් තොල කට ලෙව කකා හිතේ හැටියට රස විඳින්න පුළුවන් තැනක් ගැන දන්නෙ නැත්නම්. එහෙමයි කියල අවුලක් ගන්න එපා. අපි කියන්නම් පට්ට රස බ්‍රවුනි කෑල්ලක රස පහස නිදහසේ විඳින්න පුළුවන් නියම තැන් ටිකක්.
හැබැයි ඉතින් කාලා නිකන්ම යන්න එපා. රස කොහොමද කියල අපිටත් කමෙන්ට් කරන්න.
1. Oshella
හෝම් බේකර්ස් සම්ප්‍රදායෙ උඩින්ම ඉන්න අතුරුපස නිෂ්පාදකයෙක් තමයි ඔෂෙලා. චොකලට් රසයෙන් පිරුණු මෙයාලගෙ එක්ලෙයාස් වලටත් එහා ගියපු පට්ට රසක් තමයි බ්‍රවුනි එකේ තියෙන්නෙ. බ්‍රවුනි එකේ මැද්දට එන තද චොකලට් රසක් තියෙන ටිකක් මෘදු කේක් තට්ටුවෙන් තමයි ඔෂෙලාගෙ බ්‍රවුනි වල ගතිය එන්නෙ. රු. 150කට 200කට, මේ රසම රස බවුනි කෑල්ලක් රස බලන්න පුළුවන් වුනාට අඩුම තරමෙ කෑලි 6ක වත් ඇණවුමක් නම් කලින් දාන්න ඕන.
2. Hansa Coffee
චොකලට් වලට කෑදරයි නම්, යන්න හැව්ලොක් ටවුන් වල හන්ස එකට. එතන තියෙනව රු. 150කට බඩ පිරෙන්න කන්න පුළුවන් ලොකු බ්‍රවුනි කෑලි. හිතේ හැටියට කන්න පුළුවන්. හැබැයි මෙයාලගෙ බ්‍රවුනි වලට ගන්න චොකලට් වල චොකලට් රස නම් උපරිමයි. කොටින්ම කියනව නම් කටේ ඇලෙන ගාණට චොකලට්. කාලා බලන්නකෝ.
3. Ru's Kitchen
අන්න බ්‍රවුනි. පිස්සු හැදෙන රසක් තියෙන්නෙ. රූගේ බ්‍රවුනි ඇවිල්ල ඔරිජිනල්ම බ්‍රවුනි කියල කියන්න පුළුවන්. අඩු නැතුව තට්ටු තුනේ මැජික් එක තියෙනව. විශේෂයෙන්ම බ්‍රවුනි කෑල්ලෙ උඩින්ම තියෙන පතුරු ගැලවෙන ගාණට බේක් වුනු චොකලට් තට්ටුව. ඒ විතරක් නෙවෙයි මැද්දට වෙන්න තියෙන ටිකක් මෘදු කේක් තට්ටුවෙත් නියම ගාණට චොකලට් රස තියෙනව. කෑල්ලක් රු. 100ක් 150ක් වගේ වෙන්නෙ. හැබැයි මේ රසම රස බ්‍රවුනි කෑල්ලක් කන්න ඕන නම් එක්කො බෙල්ලන්විල ශ්‍රී සෝමරත්න මාවත පැත්තට යන්න ඕන. නැත්නම් කෝල් කරල ඇණවුමක් දාන්න ඕන.
4. a & m Cupcakes
ගාලු පාර, බම්බ – කොල්ලුපිටි මායිමේ තියෙන මේ කඩේ නමින් කප් කේක් වුනාට මෙයාල ලඟත් තියෙනව රසම රස බ්‍රවුනි. කෑල්ලක් රු. 150ක් 200ක් වගේ වෙනව. රස උපරිමෙන්ම තිබුණත් ගාණෙ හැටියට බ්‍රවුනි කෑල්ල තව පොඩ්ඩක් ලොකු වුනානම් මරු.
5. Cafe Eklektik
කඩේ නම කියවන්න බැරි වුනාට රු. 50ක් වගේ ගාණකට මේසෙට එන තද චොක්ලට් රසින් පිරුණු බ්‍රවුනි කෑල්ලට වගකියන්න නම් බැරි වෙන එකක් නෑ. කොළඹ 07, ආර්. ජී. සේනානායක මාවතේ තියෙන මේ කඩේ බ්‍රවුනි, සාමාන්‍ය බ්‍රවුනි වුනාට රස නම් හොඳයි.
6. Keshiya Bakes
පට්ට රසයි කියන්න බැරි වුනාට මෙයාලගෙ බ්‍රවුනිත් සෑහෙන්න හොඳයි. රු 100කට 150කට ගන්න පුළුවන්. තව පොඩ්ඩක් චොකලට් රස වැඩි වෙලා උඩ චොකලට් තට්ටුවෙ ක්‍රිස්පි ගතිය ආව නම් තමයි නියම.
7. RTM Delights
ආර්. ටී. එම් ඩිලයිට්ස් කියන්නෙ හෝම් බේකර්ස් සම්ප්‍රදායෙ නැගී එන තරුවක්. රාජගිරියෙ තමයි මෙයාල කෑම හදන්නෙ. බ්‍රවුනි විතරක් නෙවෙයි, තව තව අතුරුපස ජාති වගේම කෑම ජාතිත් ගොඩක් මෙයාල ලඟ තියෙනව. විශේෂයෙන්ම මෙයාලගෙ බ්‍රවුනි එක ගැන කියන්න හිතුවෙ. රු. 120ක් වගේ ගාණකට කොළඹ පැත්තෙ ගන්න පුළුවන් හොඳ බ්‍රවුනි අතර මෙයාලගෙ බ්‍රවුනි එකත් තියෙන නිසා. හැබැයි තව පොඩ්ඩක් විතර චොකලට් රස වැඩි වුනා නම් තමයි මට නම් සතුටු.
කොහොම වුනත් බවුනි කියන්නෙ සුපිරි අතුරුපසක්. සමහරු නම් බ්‍රවුනි ඩෙසට් එක විදියට නැතුව ඩයට් එක විදියටත් කනව. උදාහරණයක් විදියට ගත්තොත් අපේ YAMU ඔෆිස් එකේ කට්ටිය. හහ්.. නිකන් කිව්වෙ. එහෙමයි කියල ඔයාලත් බ්‍රවුනි තනියෙන් කන්න යන්න එපා. බෙදා ගෙන කන්න. ඒක හොඳ පුරුද්දක්නේ.
