Artwork for revisiting-sri-lankas-hotels - top banner 1
Artwork for day-outing-under-rs-3000 - top banner 2

හවස 4.20ට ‘හඳට යන’ රොකට් එක

420 කියන්නෙ ලංකාවේ ගොඩක් දෙනකුට අලුත් දෙයක් වුණාට…

Posted by

420 කියන්නෙ ලංකාවේ ගොඩක් දෙනකුට අලුත් දෙයක් වුණාට 420 සමරන හේතුව නම් ගොඩක් දෙනකුට අලුත් නැතුව ඇති. ඒ තමයි ගංජා!

අැයි 420?

420 සැමරුම පටන්ගන්නෙ 1970 දශකයේ කැලිෆෝනියාවේ හයිස්කූල්වල කියල තමයි කියන්නෙ. දැන් වගේ නෙවෙයි, ඒ කාලේ ගංජා කියන්නෙ ලෝකේ හැමතැනම වගේ තහනම් මත්ද්‍රව්‍යයක්. 1971 දි කැලිෆෝනියාවේ සැන් රෆායල් හයිස්කූල් එකේ කොල්ලො කෙල්ලො ටිකකට හම්බ වුණා අතින් ඇඳපු මැප් එකක්. ඒකේ තිබුණේ ඒ කිට්ටුව තිබුණ කියන ගංජා හේනකට යන පාර. ඉතිං කට්ටිය ඉස්කෝලෙ ඇරුණට පස්සෙ හවස 4.20ට සෙට්වෙනවා මේ හේන හොයාගෙන යන්න.

මේ කියන හේන එයාලට කවදාවත් හොයාගන්න බැරිවුණත් ඒක හොයන්න යන එන ගමන් කට්ටිය තමන්ගෙ ළග තිබුණු ගංජා බෙදාහදාගෙන ගහන්න පුරුදු වුණා. හේන හොයන වැඩේ අතෑරල දැම්මත් හවස 4.20ට සෙට්වෙන එකත් එක්ක “420” කියන ඉලක්කම ගංජාවලට පාවිච්චි වෙන කෝඩ් එකක් බවට පත් වුණා. මේකෙන් තමයි පස්සෙ කාලෙක හතර වෙනි මාසේ 20 වෙනි දා ගංජා සැමරුම් දිනය බවට පත්වෙන්නෙ.

පත්තුකරන නැකත?

ලෝකේ පුරා එකඑක අය එකඑක විදියට 420 සමරනවා. කලිනුත් කීව වගේ ඒ කාලේ ගංජා කියන්නෙ ඇමරිකාවේ තහනම් මත්ද්‍රව්‍යයක් නිසා, එහේ තිබුණු කවුන්ටර්-කල්චර් ව්‍යාපාරවල අය, තමන්ගේ ක්‍රමවිරෝධයේ ප්‍රකාශනයක් විදියට ගංජා පාවිච්චි කළා. පස්සෙ කාලෙක ගංජා නීතිගත කිරීම ගැන කතාබහත් එක්ක 420 සැමරුම ඊට වඩා විවෘත එකක් බවට පත් වුණා. ගංජාවල තියෙන ඖෂධීය සහ අනිත් ගුණ ගැන කතාකරන්නත්, තාමත් ගංජා තහනම් පැතිවල ගංජා නීතිගත කිරීමේ උද්ඝෝණවලටත් සමහරු 420 සැමරුම යොදාගන්නවා. තවත් සමහරු යාළුවොත් එක්ක, එහෙමත් නැත්නම් තනියම ජොයින්ට් එකක් ගහලා, පැණිරස දේවල් එහෙම කාලා, ස්ටෝනර් මූවි එකක් එහෙම බලලා 420 සමරනවා.

ගංජා නීතිගත කරලා තියෙන පැතිවල නම් කට්ටිය ලොකු ගංජා පාටි දාලා 420 සමරනවා. ඒ පැතිවල සමාගම් නත්තලට, වැලන්ටයින් එකට, සිංහල අවුරුද්දට වගේ 420යටත් ඩිස්කවුන්ට්, තෑගි තරග වගේ දේවල් පවත්වන්න පටන්අරන්.

ලංකාව ඉන්දියාව වගේ රටවල අවුරුදු දහස්ගාණක් තිස්සේ ගංජා පාවිච්චි වුණත් ඉංග්‍රීසි නීතියත් එක්ක ඒක තහනම් වුණා. අපට තහනම ගෙනාපු යුරෝපේ සහ ඇමරිකාවේ ගංජා තහනම මේ වෙද්දි අයින් වෙමින් තිබුණත් අපේ රටේ තාම ගංජා තහනම්.

Image: www.cannabischapellv.com

ලංකාවේ 420

හැබැයි ලෝකයේ ගංජා සම්බන්ධ ව තියෙන නීති වෙනස්වීමත් එක්ක වාණිජ බෝගයක් හැටියට ලංකාවෙත් ගංජා වවන්න යන කතාවක් පහුගිය කාලේ ආවා. ඒ වගේ ම ආචාර්ය වසන්ත සේන වැලිඅංගගේ ගේ, “ත්‍රෙලෝක්‍යවිජයා” වගේ පොතපත සහ මේ ගැන අලුතින් සිද්ධවෙන හැදෑරීමුත් එක්ක ලංකාවෙත් ගංජා ගැන කතාබහ ටිකක් අලුත්වෙලා තියෙනවා.

මේකත් එක්ක, මෙච්චර කල් හොරෙන් කෙරුණු 420 සැමරුම්වලට අමතර ව, එළිපිට මේකේ තියෙන ගුණාගුණ ගැන කතාකරන්නත්, ගංජා සම්බන්ධ ව ඉංග්‍රීසි ආණ්ඩුවෙන් ගෙනාපු නීති සහ වැරදි මත වෙනස් කරන්නත් ලංකාවේ 420 සැමරුම යොදාගන්න පටන් අරන්.

ලෝකේ ගංජා නීතිගත කරපු පැතිවල ජීවත්වෙන අයට හිතේ හැටියට මේක සමරන්න පුළුවන් වුණත් ලංකාවේ තාමත් මේක නීති විරෝධී නිසා අද හවස 4.20ට ජොයින්ට් එකක් පත්තු කරලා 420 සමරන්න කියලා කියන්න අපට බෑ. හැබැයි ඉතිං නීතියෙ මොනව තිබුණත් තමතමන්ට ඕන විදියට 420 සමරන අයට එහෙම කරන්න එපා කියන්න අපි කවුද? ඉතිං ලෝකේ කොහෝ ඉඳන්, කොයි විදියට සැමරුවත්, සමරන, නොසමරන හැමෝටම ආතල්ජනක 420යක් වේවා!

Cover Image: PinnapleExpress ( 2008) Move poster 
Leave a comment
Last 7 Days

Trending Today