Artwork for Coke with food - top banner
Artwork for FOOD DELIVERY DURING COVID-19 CURFEW HOURS TOP BANNER 2
Artwork for PMF essentials sbb 2

කොරෝනා වෛරසය ශරීරගත වී ඇත්දැයි සැක නම් ඔබ කළ යුතු දේ

ලංකාව රෝගීන් සියයේ සීමාවට ආසන්න වෙමින්

Posted by

ශ්‍රී ලංකාව මේ වන විට කොරෝනා රෝගීන් සියයේ සීමාවට ආසන්න වෙමින් කියල ඔබ හැමෝම හොඳින් දන්නවා ඇති. දෑත් සේදීමේ ඉඳලා නිරෝධායනය වීම දක්වා සියලු ආරක්‍ෂිත පියවර ඔබ අනුගමනය කරමින් තිබුණත්, කොරෝනා වෛරසය මේ වෙද්දිත් ඔබේ ශරීරයට ඇතුළු වෙලා තියෙන්න පුළුවන්. ඒකට හේතුව තමයි, වෛරසය ශරීරගත වෙලා තිබුණු ඇතැමුන් නිරෝධායන කටයුතු පටන්ගන්නත් පෙර ඉඳන් ම අප අතර සමාජයේ සැරිසරමින් හිඳ තිබීම. අවාසනාවන්ත විදිහට, ඔවුන්ගෙන් සමහරු හිතාමතා නිරෝධායනය වීම මඟහැරිය බවට මෑතකදි අනාවරණය වුණා. තවත් සමහරු රෝගය ශරීරගත වී ඇති බව නොදැන සමාජගත වෙමින් සිටි බවට පුවත් පළ වුණා. රෝග ලක්ෂණ පහළ වෙන්නෙත් දින 14කට පසුව නිසා මේ නොදැනුවත්කම අප හැමෝටම අනතුරක්.

ඉතින් කාට කාට රෝගය වැළඳී ඇත්දැයි අපට අනුමාන කළ නොහැකි නිසා හැමෝම තම තමන් පිළිබඳ අවධානයෙන් සිටීම වැදගත්. ඔබේ ශරීරයට වෛරසය ඇතුළු වෙලා කියල ඔබට සැකයක් තියනවා නම් අනුගමනය කළ යුතු පියවර ගැනයි අපි මේ ලිපියෙන් කියන්නේ.

කලබල වෙන්න එපා

මුලින් ම.. කලබල වීමෙන් වළකින්න. කලබල වුණොත් කිසිවක් විසඳගන්න බැරිව යනවා. COVID-19 ඉක්මනින් පැතිරෙනවා තමයි. හැබැයි නිසි වෙලාවට හඳුනාගත්තම, ප්‍රතිකාර ගත්තම බය වෙන්න දෙයක් නෑ.

වෙන් වෙන්න

ඉස්ඉස්සෙල්ලා ම ගත යුතු වැදගත් ම පියවර මේකයි. ඔබ අන් අයගෙන් වෙන් වෙන්න. නිවසේ ඔබට ම වෙන් වුණු කාමරයක් වෙන් කරගන්න. කිසිවෙක් සමග ඇසුරු කිරීමෙන් තොරව තනියම ඉන්න. හැම වෙලේ ම ෆේස් මාස්ක් එකක් පළඳින්න. ගෙදර අය සමග කතා කරන්න අවශ්‍ය විට පවා දුරකතනයෙන් කතා කරනවා නම් වඩාත් හොඳයි.

හැම විට ම පිරිසිදුව ඉන්න. තත්පර 20ක් පමණ සබන් යොදා දෑත් සේදීම හෝ ඇල්කොහොල් බේස් වුණු සැනිටයිසර් එකකින් දෑත් පිරිසිදු කිරීම අනිවාර්යයි. නොසේදූ දෑත්වලින් මුහුණ අතගෑමෙන් වළකින්න. 

රෝග ලක්ෂණ හඳුනගන්න

COVID-19 රෝගයේ නිශ්චිත රෝග ලක්ෂණ පහත පරිදියි.

  • උණ
  • වෙහෙස බව
  • වියළි කැස්ස

එහෙත් සමහර රෝගීන්ට ඇඟපත වේදනා, සෙම්ප්‍රතිශ්‍යාව, උගුරේ අපහසුතා සහ පාචනය වැනි රෝග ලක්ෂණ ද හටගත හැකියි. මේවා මඳ වශයෙන් පටන්ගෙන ක්‍රමයෙන් වැඩි වනු ඇති.

පැය දෙකකට වරක් උණ බලා සටහන් කරගන්න. අනෙක් රෝග ලක්ෂණ ගැනත් අවධානයෙන් ඉන්න. COVID-19 සඳහා ම වෙන් වූ රජයේ දුරකතන මාර්ග වන 117 සහ 1999 පැය 24 ම ක්‍රියාත්මකයි. රෝග ලක්ෂණ ගැන ඔබට කිසියම් දෙයක් දැනගැනීමට අවශ්‍ය නම් මේ අංකවලට අමතා මහජන සෞඛ්‍ය නිලධාරීන්ගෙන් වැඩි විස්තර සහ උපදෙස් ලබාගන්න.

බෙදා ගන්න එපා

ඔබ විසින් පාවිච්චි කරන ලද කිසිවක් ඔබේ පවුලේ අයට අතපත ගාන්නට ඉඩ දෙන්න එපා. වෛරසය ඕනෑ ම දෙයක් මඟින් පැතිරිය හැකියි. ඔබේ කාමරයේ දොර අසල තබන ලද මේසයක් මත ඔබේ කෑම පිඟාන තබා යන්නැයි ඔවුන්ට කියන්න. එවිට ශාරීරික ස්පර්ශ වීම් හෝ ගැටීම් අවම කරගත හැකියි. පාවිච්චියෙන් පසු ඉවත දැමිය හැකි (උදා: කඩදාසි) පිඟන්, කෝප්ප සහ හැඳි ආදිය ඔබ වෙනුවෙන් භාවිත කරනවා නම් වඩාත් හොඳයි. පාවිච්චි කරන ලද ටිෂූ ආදියත් මේ විදිහට ම නිසි පරිදි බැහැර කළ යුතුයි.

තත්ත්වය සමනය වන තෙක් රෝගියාට ම වෙන් වූ නානකාමරයක් පාවිච්චි කළ හැකි නම් වඩාත් හොඳයි. ඒත් එවැන්නක් වෙන් කිරීමට අපහසු නම් සියලු දෙනා ම භාවිත කරන නානකාමරය රෝගියා සමගත් බෙදාගන්න සිදු වෙනවා. එහෙම අවස්ථාවලදී අන් අය නානකාමරය පාවිච්චි කළ යුත්තේ රෝගියා විසින් භාවිත කරන ලද සියලු දෑ මනාව පිරිසිදු කිරීමෙන් පසුවයි.

1990 අමතන්න

Photo credits: dailynews.lk

රෝග ලක්ෂණ දිගින් දිගට ම පවතිනවා නම් වහා ම 1990 අංකය අමතන්න. සුවසැරිය ගිලන් රථ සේවය හැකි ඉක්මනින් ඔබ වෙත ළඟා වෙනු ඇති. COVID-19 බවට සැක කෙරෙන රෝගීන් හැසිරවීම ගැන සහ ඔවුන් යා යුත්තේ කොහේද ආදී වශයෙන් ඔවුන්ට විශේෂ උපදෙස් සපයා තිබෙනවා. ඒ නිසා ඔබේ පවුලේ අයට හෝ ඔබේ වාහනයට රෝගියා නිරාවරණය කිරීමෙන් තොරව වගේ ම, යා යුත්තේ කොහෙටදැයි හිතමින් කාලය නාස්ති කිරීමෙන් තොරව රෝගියා රෝහල්ගත කිරීමට පහසුව සැලසෙනවා.

Leave a comment
Last 7 Days

Trending Today