මැකා තමයි මැකා!

මැකා නෙවෙයි ඒකා නම් යකා..

ටෝක් කරල ටෝක් කරල කොහොමහරි අර ළමයි දෙන්නගෙන් ගැලෙව්වනෙ පාර්ටියක්, ෆස්ට් සැලරි කියල. හැබැයි ඉතින් එයාලත් හරි හොඳ කට්ටිය ඈ.. මුලින් නිකම් බොරුවට බෑ බෑ කිය කිය ඉඳල එක පාරටම..

අපිව සප්‍රයිස් කරන්නත් එක්ක, මෙන්න ඊයෙ කිව්ව හා කියල.

එච්චරයි ඉතින්. ආයෙ හැරෙන තැපෑලෙන් විශ්වියි මායි බැලුව සනික තැනක්, දාගත්ත පිටත් වෙන්න වෙලාවක්..

රුං.. ගාලා!

4.30ට දිනේෂ් එක්ක ඔන්න පළවෙනි සෙට් එක පිටත් වුනා ඈ. ඊට පස්සෙ මායි, මැකායි, ලන්ත්‍රයි 5.30ට විතර. විශ්විත් මගෙ හිතේ ඕන නම් පැය බාගයක පරක්කුවක් ඇති. ඒත් කොහෙද, ඒ පරක්කුවෙන්නෙ.. අපි ගිහින් වාඩි වෙනකොට, මුලින් ගියපු සෙට් එක බයිට්, ඩයට් සියල්ල ඕඩර් කරල බාගෙට ඉවර කරලත් එක්ක. අනේ පිඟන් 3, 4ක් මේසෙ උඩ එහෙට මෙහෙට කැරකි කැරකි තියෙනවා.. සොහොන් පිට්ටනි වගේ. කටු විතරයි ඕං..

මොනව කරන්නද ඉතින්,

‘ගන්නකො ඔය ජිං එකවත් එක ෂොටක් දාන්න’ කියල මම ගත්ත බෝතලේ අතට. අරගෙන දාගත්ත අඩු ෂැන්ඩි 100ක්. දාගෙන චිරාස් කියල ඔන්න එක උගුරට.

“බයිටක් ගනින් බයිටක් ගනින්. හප්පෝ.. බඩ පපුවත් එක්ක දාලා ගියේ බං. ජින්ද මොනවද ඒ..”

වෙලාවට එහා පැත්තෙ සෙනුරි හිටියෙ. ඒකත් හිටිය කිව්වට හෙමින් නෙවේ, කිඹුල වගේ ගිලල ගිලල පුටුවෙ දිගාවෙලා.. ගෑරුප්පුවෙන් පොඩි චිකන් කෑල්ලක් එහෙට මෙහෙට කර කර ඉන්නව. මම බැලුවාම ‘හී..’ ගාලා දාපි හිනාවක්. මට නේද..

දැම්ම අත, ගත්ත පිඟානෙ තිබ්බ චිකන් කෑල්ල, කාලා දැම්ම එක කටට. 

ඒ කෑවට..

දැනුනෙවත් නෑ කියන්නකො. බැරිම තැන එතනම තිබ්බ පෙපර් බීෆ් එකක් (රු. 850), ගත්ත ඒකෙන් කෑල්ලක්. අරගෙන ඒකත් එක කටට.

ෂැහ්! අන්න බයිට්නෙ. මරු ආ.. කෙලින්ම අර ස්ප්‍රීට් ගතිය කොහෙන් ගියාද නෑ. හොඳ හැටි ෆ්‍රයි කරපු තඩි බීෆ් කෑලි. අමු මිරිස්, රතුමිරිස්, ගම්මිරිස් සුදුළූණු වලින් රසකරපු සුපිරි සෝස් එකක් එක්ක මික්ස් කරල ලූණූ අඩුම කුඩුම ටිකත් උඩින් දාලා.. ආයෙ නමේ හැටියටම, පෙපර් රසයෙනුත් අනූන වෙන්නම.

ඒ කාලා අනික් පැත්තට කෑවා මැකාගෙ පිඟානෙ තිබ්බ මික්ස් රයිස් (රු. 890) ටිකකුත්. මොකද, නොකිව්වට ඒ වෙද්දි මට පොඩි බඩගින්නකුත් අල්ලල තිබ්බෙ.

රයිස් එකත් ටොප් ඈ.. හොඳටම මික්ස් කරලත් තියෙනව. ඉස්සො, දැල්ලො, මාළු, බීෆ්, පෝර්ක්, බිත්තර සියල්ලම වගේ. හැබැයි ඒවා දාල තියෙන ප්‍රමාණ නම් මදි. මොකද රයිස් එකේ සයිස් එකයි, මස් මාළු ටිකයි එක්ක බැලුවාම අඩුම තරමෙ කටවල් 5කටවත් එකක් අහුවෙන්න? ඒත් ඉතින් රස අතින් නම්.. නියමයි. එළවළු අඩුම කුඩුම ටිකත් නූලට දාලා, බත් ටිකත් ලාවට ෆ්‍රයි වෙන්න අල්ලල නිසා.. කතහැකි යමරෙට.

වැඩේ කියන්නෙ ඔය අතරට මෙන්න එක පාරටම එනව සීෆුඩ් රයිස් එකක්. බැලින්නම් අර මික්ස් රයිස් එකත් එක්කම අපේ කට්ටිය දාපු ඕඩරයක්. එන්නෙ පැයකට විතර පස්සෙ. ඇත්තටම මමත් එතකොටයි දන්නෙ එහෙම ඕඩරයක් දාලත් කියල. කිව්වට විශ්වාස කරන්න යාළු, ඒ අතරට මම දැම්ම හොට්බටර් කට්ල්ෆිෂ් එකයි (රු. 900), පෝර්ක් ස්ටු එකයිත් (රු. 840) මේසෙට ආවනෙ.

“කිචන් එක බිසි”

“බිසි නං අනිත් ඒවා ආවෙ?”

ඒකට උත්තර නෑ. ඊටත් ග්ලාසස් ටිකක් ගේන්න කිව්ව. බීලා ඉවර වෙනකනුත් ඒක නෑ. සර්විස් එක කියන්නේ.. මෙනුව ගේන්න කිව්වාම, ගෙනැල්ල දීලා දුවනව. දෙයක් අහන්නත් කවුරුත් නෑ, ආයෙ පැයකට විතර එන්නෙත් නෑ.. අනේ මංද ඈ..

කොහොමරි ඉතින් කෙටියෙන්ම කියනව නම් හොට් බටර් කට්ල්ෆිෂ් එකත්.. රස හොඳයි, හැබැයි ෆ්‍රෙෂ් නෑ. අනික තෙල් ආකරේ. කද්දි තේරෙනව ලඟදි ගෙනාපු බඩු ටිකක් නම් නෙවෙයි කියල. හැඩේට කපල, ලූණු, ලූණු කොළ, මිරිස්, ගම්මිරිස් ටිකත් දාලා පදමට හදල තිබ්බට, බයිට් එකට මිසක් නිකම් නම් කන්න එච්චරම සෙට් වෙන්නෙ නෑ මගෙහිතේ.

ඒකට, පෝර්ක් ස්ටු එක නම් තිබ්බ ලෙසටම. දැක්කාම කටට කෙල උනනව. තෙල් ගතියත් ගානට. අමු මිරිස්, ගම්මිරිස්, ලූණු, තක්කාලි එක්ක අල, කැරට් ටිකකුත් දාලා, තරමක් හිඳෙන්න ඇරල.. මස් කෑලිවලට පවා පදම අල්ලල. අනික විශේෂයෙන්ම කියන්න ඕන සමහර තැන්වල වගේ නෙවෙයි, මෙයාලගෙ පෝර්ක් එකේ මස් කෑලිම.. තෙල් කෑලි ඕන නම් 3, 4ක් තියෙන්න ඇති.

ඒත් කොහෙද ඉතින්.. ගෙනාවට කිසිම දෙයක් තියාගන්න බෑනෙ. රවුමෙ ගිහිල්ල එනකොට ප්ලේට් එක ඉවරයි. ඇත්තටම ඉවර නොවුන එකම දේ බෝතලේ විතරයි. ඒකත් අර දෙවනියට ගෙන්නපු බාගෙ නිසා. ඊටත් කට්ටියට ඉක් ගැවෙන්න වැදිලත් එක්කනෙ.

ම්ම්.. කන් සාක්කුවෙ දාගෙන එළියට බැස්සට මොකද.. හිතට නම් කිසිම ගැම්මක් නෑ යාළු අවංකයෙන්ම. අනේ මන්දා..!

“ඒ මොකෝ බං කරන්නෙ?”

“යන්න බං හදන්නෙ. වැඩකුත් නෑනෙ”

“යන්න එපා බං. ඉඳාන්කො, මං ගාව පොඩි ගාණක් තියෙනව. උබ ගාව රු. 1000ක් වගේ ලයින් කරගන්න තියෙයිද. අඩියක් ගහන්න කියල බං බැලුවෙ. යමංද දෙන්නත් එක්ක”

එවෙලෙ ආපු කුප්ප අදසක් දාලා ගෙදර යන්න ඉඳපු සරිත්ගෙත් ඔළුව කාපු මම අන්තිමට කොහොම හරි අඩියක් ගහන වැඩේ සෙට්ල් කරගත්තා. කරගෙන පික්මියක් එහෙමත් දාගෙන... ට්‍රැෆික් එකේ ම ඇද්දා කොට්ටාවට.

“ඕ..න්න ඔතන වම් පැත්තෙ නවත්තන්න මල්ලි”

හයර් එක ඉවර කරපු අපි දෙන්නා රෙස්ටුරන්ට් එක ඉස්සරහ පාරෙ අනික් පැත්තෙන් බැහැගත්තෙ ට්‍රැෆික් එකේ යූ ටර්න් ගහනව තියා හිතන්නවත් බැරි නිසා. හැබැයි අපි බැස්ස සනිකව පාර පැනලා අදාළ තැනට ගොඩවුණා.

ඒකෙ නම පැනරෝමා. දෙවනි තට්ටුවෙ තමයි බාර් එක තියෙන්නෙ. පළවෙනි තට්ටුවෙ ෆැමිලි රෙස්ට් එක. වැඩේ කියන්නෙ ඒක නෙවෙයි, බාර් එකට ඇතුල් වෙද්දි ම එන ගැම්මනෙ. අඩ අඳුරෙ, ළා සංගීත පාරකුත් යනව. කොටින්ම කියනව නම් බොන්න කියාපු ම ක්ලයිමෙට් එක.

අමුණල කරල එළිමහන් කොටසට ම ගියපු අපි දෙන්නා ඇල්ලුවා ටිකක් අයිනට වෙන්න තිබුණු මේසයක්. මොකද බොන එක නිදහසේ බොන්න එපැයි. අල්ලල ඉතින් කඩිය වගේ එහේ මෙහේ දුවන වේටර් මල්ලි කෙනෙක්ටත් කතා කරලා දැම්මා ඕඩරේ… මික්ස් ග්‍රිල් එකයි, ස්පෙෂල් රයිස් එකයි සංස්ථා පරණ අරක්කු එකයි.

හා.. දැන් ගේන්නකො! අද ගසනවා නසරානි වෙන්න.

“සර් කෑම ටික ගේන්න ටික වෙලාවක් යයි. මොකද මික්ස් ග්‍රිල් එකට ජාති ගොඩයිනෙ.”

“හා..රි හරි හරි. ඔයා කලබල නැතුව ගේන්නකො.”

ඒ වැඩෙත් වචන දෙක තුනෙන් බැලන්ස් කරපු අපි බැස්සා ලොකු කතාබහකට.

ඔන්න ඒ අතරෙ කොහොම හරි අරක්කු ටිකයි සැන්ඩි ටිකයි, පිඟන් කෝප්ප හැඳි ගෑරුප්පු අඩුපාඩු ටිකයිත් මේසෙ උඩ. නිකම් කතා කරන එකේ පොඩි එකක් දාගත්තාම මොකෝ කියල අපි දෙන්නා දැම්මා ඔන්න ‘චිරාස්’ පාරත්. දාලා ඉතින් ආයෙත් බර කතා බහේ…

ඔය විදියට පැය බාගයක් විතර යන්න ඇති. එක පාරටම ඈතින් පේන්න පටන් ගත්තා කියන්නකො වේටර් මල්ලි පුටු මේස මැද්දෙන් එනවා, බරට බරේ, අපේ කෑම ටිකත් අරගෙන. දැන් ඉතින් ඉවසිල්ලක් නෑ.

ග්‍රිල් එක මේසෙ උඩින් තිබ්බ විතරයි. සරිතුයි මායි මූණට මූණ බලාගත්තෙ ඇස් අදහා ගන්න බැරුව. මෙච්චර ලොකු මික්ස් ග්‍රිල් එකක්? දන්නව නම් රයිස් ඕඩරේ කරන්නෑ මා දෙයියෝ…

අවංකයෙන් ම, ඒක නම් මාර ම මික්ස් ග්‍රිල් එකක් යාළු. හිතන්නකො, ගැඹුරු තෙලේ බැදපු සෝසේජස්, කකුළුවෙක්, පෝර්ක්, චිකන්, බීෆ්, ඉස්සො, දැල්ලො, මාළු කූරියෙක්, සුදු ලූනු, අන්නාසි. ඒ හැරුනාම පදම් කරලා තම්බපු අල, කැරට්, බෝංචි, ගෝවා එක්ක බුල්සායි එකකුත්!

වැඩේ කියන්නෙ හැම එකේම වගේ රසවලුත් සුපිරිනෙ. ගැඹුරු තෙලේ බැදපු හැම එකක් ම වගේ ලුණු ගම්මිරිස් දාලා පදම් කරපු ගතියක් තිබ්බෙ. ඊටත්, තම්බපුවා පට්ට රසයි. ලුණු ගම්මිරිස්වලට අමතරව මොනව හරි සෝස් වර්ගයකුත් දාලා. ඔක්කොමත් හරි මික්ස් ග්‍රිල් එකට දෙහි පොඩ්ඩක් මිරිකා ගත්තමනෙ නියම රස එන්නෙ. පිස්සු හැදෙනව ඈ… අනික ඒකෙ සයිස් එකත් එක්ක ගත්තාම බෝතලයක් නෙවෙයි දෙකක් වුණත් නතින්ග් හොඳේ!

ඒ අතරට සොටක් දෙකක් ගහන ගමන් මම රයිස් එකත් රස බැලුවා.

ඒකත් ටොප්! කියන්නකො. ලෝබ නැතුව දාලා තියෙනව චිකන්, පෝර්ක්, ඉස්සො, දැල්ලො, සොසේජස් ටික. ඒ අතරට කැරට්, ලීක්ස් අඩුම කුඩුම ටිකත්. අනික බතත් පුන්නි සම්බා වගේ හොඳ සුවඳ, රස හාලකින් හදල තිබ්බෙ. හැරත් ඒ රයිස් එකේ, සයිස් එක? හප්පොච්චියෝ… අඩිය ගහල වැනි වැනි ගෙදරත් අරගෙන ගියේ.

ඒ විතරක් නෙවෙයි, මික්ස් ග්‍රිල් එකත් ඉතුරු වුණා. ඒකත් ගෙදරටම තමයි.

හැබැයි ඒ කෑම ටිකත් එක්ක ගහපු ගැහිල්ලට නම් වටේම මේස පදිරි ඈ… බෝතලයයි, බීර එකකුයිනෙ යාළු!

වගකීමෙන් කියන්නෙ ඈ… කොට්ටාව පැත්තෙන් අඩියක් ගහනව නම් ඉතින් පැනරෝමා එකම තමයි හොඳේ.