කොවිඩ්-19 කියන්නෙ අපි දන්න ජීවිත කාලෙ ඇතුළත අපිට මූණ දෙන්න සිදු වුණු භයානක ම වසංගතය. හැබැයි ලෝකෙ මීට කලින් ඕනෑ තරම් වසංගත තත්ත්වයන් ඇති වෙලා තියනව විතරක් නෙමෙයි, මිනිස්සු ඒවට මූණ දීල ඒවා පරාජය කරලත් තියනවා.
ඉතිං අද අපි හිතුවා ඒ වගේ වසංගත තත්ත්වයන් ගැන ලෝකෙ පුරා හැදුණු චිත්‍රපටි 10ක් ගැන ඕගොල්ලන්ට කියන්න. පුළුවන් නං මේවයින් එකක් දෙකක් හරි හොයාගෙන බලන්න. බය වෙන්න නෙමෙයි, වසංගතයක් කියන්නෙ මොන වගේ එකක් ද කියල තේරුම්ගන්න ලේසි වෙයි..
Outbreak (1995)
1995 දී ඇමරිකාවේදී රිලීස් වුණු මේ ෆිල්ම් එකෙන් කැලිෆෝනියාවේ කුඩා නගරයකට බලපාන වෛරස තත්ත්වයක් නිසා උදා වෙන ව්‍යසනයක් ගැන කියවෙනවා. මෙය බෝ වෙන්නේ වඳුරන්ගෙන්. මේ චිත්‍රපටිය ප්‍රදර්ශනය ඇරඹෙන කාලයේදීම එවැනි ම ඉබෝලා වැනි වෛරස තත්ත්වයක් ව්‍යාප්ත වෙන්න පටන්ගත් නිසා චිත්‍රපටිය නිර්මාණය කළ අය වගේ ම ප්‍රේක්ෂකයනුත් විමතියට පත් වෙලා තියනවා. මේක අධ්‍යක්ෂණය කළේ වුල්ෆ්ගැන්ග් පීටර්සන්.
28 Days Later (2002)
ඩැනී බොයිල් අධ්‍යක්ෂණය කළ බ්‍රිතාන්‍ය චිත්‍රපටියක් වෙන මේක තිරගත වුණේ 2002 දී. අයර්ලන්තයේදී තමයි රිලීස් වුණේ. එක්සත් ජනපදයට බලපාන වෛරස තත්ත්වයක් ගැනයි ෆිල්ම් එකේ කතාව. සොම්බි වර්ගයේ චිත්‍රපටිවලට ආස අය ඉන්නව නං 28 ඩේස් ලේටර් අනිවාර්යයෙන් බලන්න.
Carriers (2009)
වසංගතයෙන් ගැලවුණු ප්‍රදේශයක් හොයාගෙන යන මිතුරන් පිරිසක් ගැන කියවෙන මේ ෆිල්ම් එක 2009 දී ඇමරිකාවේ දී ප්‍රදර්ශනය ඇරඹුවා. ඒ මිතුරන් කණ්ඩායමෙන් කෙනෙකුටත් වෛරසය බෝ වීමත් එක්ක සිදු වෙන සිදුවීම් දාමය වටායි කතාව ගෙතෙන්නේ. මේක අධ්‍යක්ෂණය කළේ ඇලෙක්ස් පාස්ටර් සහ ඩේවිඩ් පාස්ටර්.
Black Death (2010)
ක්‍රි.ව. 1300 දී පමණ පැතිරුණු වසංගතයක් තේමා කරගත් මේක තවත් බ්‍රිතාන්‍ය චිත්‍රපටියක්. අධ්‍යක්ෂවරයා ක්‍රිස්ටෝෆර් ස්මිත්. මේ වසංගතයෙන් මිනිස්සු මිලියන 200ක් විතර මිය යනවා. වසංගතයෙන් බේරීමට උත්සාහ කරන පිරිසකගේ ගමන ගැනයි කතාවෙන් කියවෙන්නේ. ෆිල්ම් එක රිලීස් වුණේ අයර්ලන්තයේදී.
Contagion (2011)
ස්ටීවන් සොඩර්බර්ග්ගේ අධ්‍යක්ෂණයක් වෙන මේක නං මේ අවුරුද්දේ සෑහෙන කතාබහට ලක් වුණු චිත්‍රපටියක්. 2011 දී ඇමරිකාවේදී තමයි ප්‍රදර්ශනයට විවෘත වුණේ. මේ ඇති වෙලා තියන කොරෝනා වසංගත තත්ත්වයට බෙහෙවින් සමපාත, ලොව පුරා පැතිරෙන වෛරසයක් ගැන කියවෙන ෆිල්ම් එකක්. ඒ නිසා ම කොරෝනා හේතුවෙන් අයහපත් මානසික තත්ත්වයක ඉන්න අය මේ දිනවල මේක නොබලා ඉන්න එක වඩාත් හොඳයි කියල විචාරකයන් කියනවා.
Flu (2013)
ෆ්ලු කියන්නෙ දකුණු කොරියානු නිර්මාණයක්. කිම් සුං-සු අධ්‍යක්ෂණය කළ මේක දකුණු කොරියානු නගරයකට බලපාන දරුණු වෛරසයක් වටා දිවෙන කතාවක්. කතාවෙ හැටියට මේ වෛරසය ආසාදනය වුණු අයට ජීවත් වෙන්න ඉතිරි වෙලා තියෙන්නේ පැය 36ක් විතරයි. මේ ව්‍යාකූල තත්ත්වය නිසා නගරය මැදි වෙන අර්බුදය මොන වගේ ද කියල ෆිල්ම් එක බලල ම හොයාගන්න.
The Last Days (2013)
කලින් කියපු Carriers ෆිල්ම් එක හදපු ඇලෙක්ස් පාස්ටර් සහ ඩේවිඩ් පාස්ටර්ගේ ම නිර්මාණයක් ද ලාස්ට් ඩේස්. 2013 දී බාර්සිලෝනාවලදී රිලීස් වුණ මේක බැලුවොත්, දැන් අපි මේ මූණ දෙන සමාජ දුරස්ථකරණයට සමාන්තර සිදුවීම් තියන කතාවක් දැක බලාගන්න පුළුවන්. වසංගතයක් අතරතුරේ මෘදුකාංග ඉංජිනේරුවෙක් තමන්ගේ පෙම්වතිය හොයාගෙන යන ආකාරය තමයි ෆිල්ම් එකට ප්‍රස්තුත වෙන්නෙ.
93 Days (2016)
ඉබෝලා නමැති මරණීය වෛරසය නයිජීරියාවේ විශාලතම නගරය වන ලාගෝස්හි පැතිරෙන්නට පටන්ගැනීමත් එක්ක එය මිලියන 21ක ජනතාවට බලපාන ආකාරය ගැන කියවෙන 93 ඩේස්, ස්ටීව් ගුකාස්ගේ අධ්‍යක්ෂණයක්. 2016 දී මෙය නයිජීරියාවේදී තිරගත වීම ඇරඹුණා. 2014 දී පැතිරුණු සැබෑ ඉබෝලා වෛරසය මීට පාදක වෙලා තියනවා. මහජනතාවගෙන් සහ දේශපාලන තන්ත්‍රයෙන් එන පීඩනය හමුවේ වෛද්‍ය කණ්ඩායම් එකතු වෙලා රෝගය පාලනයට කටයුතු කරන ආකාරය විදහා පාන චිත්‍රපටියක් කියල මේක හඳුන්වන්න පුළුවන්.
Pandemic (2016)
ජෝන් සූට්ස් අධ්‍යක්ෂණය කළ පැන්ඩමික්, වසංගතයක් ගැන කියවෙන තවත් ඇමරිකානු චිත්‍රපටියක්. 2016 දී තමයි රිලීස් වුණේ. සොම්බි කතාවලට කැමති අයට හරි යන ෆිල්ම් එකක්.
Virus (2019)
2019 වසරේ ජර්මනියේදී මුලින් ම මහජන ප්‍රදර්ශනයට විවෘත වුණු වෛරස් චිත්‍රපටියේ අධ්‍යක්ෂවරයා ආෂික් අබු. මේක මලයාලම් භාෂාවෙන් හැදුණු, ඉන්දියාවේ කේරළය පාදක කරගත්ත ෆිල්ම් එකක් නිසා, විශේෂයෙන් ඉන්දීය චිත්‍රපටිවලට කැමති අයට හොයාගෙන බලන්න කියල අපි ආරාධනා කරනවා. මේක ඉන්දියාවේ 2018 වසරේ සිදු වුණු නිපාහ් වසංගත පැතිරීම ආශ්‍රිතව සිදු වුණු සැබෑ සිදුවීම් ඇසුරෙන් නිර්මාණය වුණු ප්‍රබන්ධයක්. වසංගත පාලනයකදී සෞඛ්‍ය අංශවල සේවකයන්ගේ කැපවීම මොන වගේ ද කියලත් මේකෙන් බලාගන්න පුළුවන්.
