වැනිලා අයිස්ක්‍රීම්වලට අකැමැති අය කියන්නේ එය නීරස, කම්මැලි දෙයක් කියලායි. ඒත්, එයට චොකලට් සෝස් පොඩ්ඩක්, අඹ කෑලි ටිකක්, ස්ට්‍රෝබෙරි ගෙඩියක් දෙකක්, කිතුල් පැණි ස්වල්පයක් එකතු කරගෙන බලන්න. එතකොට මේ සාමාන්‍ය වැනිලා අයිස්ක්‍රීම්වලට ගහන්න තවත් හිමකිරමක් කොහිද? වැනිලා අයිස්ක්‍රීම් නැතිව මිල්ක්ෂේක්එකක්වත් බොන්න පුළුවන්ද?
ලංකා‍ව සුන්දර වෙන්න එක් හේතුවක් තමයි, එහි මිළ අඩු, හොඳ තත්වයේ වැනිලා අයිස්ක්‍රීම් වර්ග රැසක්ම විකුණන්න තිබීම. හැම එකක්ම එකවගේ නැහැ. එලිෆන්ට් හවුස් තමයි, ලංකාවේ ප්‍රධානම අයිස්ක්‍රීම් වෙළෙන්දා. ඒත්, කාගිල්ස් උත්සාහ කරනවා එයින් සැලකියයුතු පංගුවක් ඩැහැගන්න. හයිලන්ඩ් හා කොත්මලේට පක්ෂපාතී ලෙස ප්‍රිය කරන අය ඉන්නවා. තවත්, කුඩා අයිස්ක්‍රීම් අලෙවිකරුවෝත් ඉන්නවා.
ඉතින් ‘යමු’ තීරණය කළා අයිස්ක්‍රීම් රසබැලීමක් කරන්න. මෙහිදී අපි සලකා බැලුවේ ජනප්‍රිය සුපිරි වෙළඳසල්වල ඇති මිළ අඩු වර්ග පමණයි. Il Gelato’s, Carinos සහ Hagen Dasz ආදී ඉහළපෙළේ වර්ග මෙහිදී සලකා බැලුවේ නැහැ. අපි කානිවල් අයිස්ක්‍රීම්ද මෙහි ඡායාරූපගත කර නැහැ. එය සුදු පාටයි. වැනිලා පෙනුමක් නැහැ.
මේවා අතරින් රසවත්ම එක කුමක්ද?
5. කානිවල් ලීටරය රු. 270යි
මෙය තමයි අවසන් ස්ථානයට පත්වුණේ. එය කෘත්‍රිම රසයෙන් යුක්තයි. දියාරුයි. එතරම් කිරි රසකුත් නැහැ. නරකමත් නැහැ. ඒත්, මෙවැනි අයිස්ක්‍රීම් වර්ග බ්‍රිතාන්‍යයේ නම් බාලම හා ලාභම ඒවා. එහෙත්, මෙය තමයි අප කාලා බැලූ ඒවා අතරින් මිළ අධිකම එක. ඔවුන්ගේ අයිස්ක්‍රීම් ලීටරයේ පෙට්ටිය මෙහෙම වුණාට ඔවුන්ගේ ගාලුපාරේ අයිස්ක්‍රීම්හලේ හිමකිරමනම් රසවත් බව ප්‍රසිද්ධයි.
4. හයිලන්ඩ් ලීටරය රු. 230යි
මෙයත් ටිකක් බලාපොරොත්තු සුන්කළ අයිස්ක්‍රීම් එකක්. ලංකාවේ ලොකුම කිරි නිෂ්පාදකයා වන හයිලන්ඩ්ගේ වැනිලා අයිස්ක්‍රීම් ගැන බොහෝදෙනෙක් මහ ඉහළින් කතාකරනවා. ඒත්, මේ අයිස්ක්‍රීම්එකනම් හොඳ නැහැ. එය ගොඩක් කිරිවලින් යුක්තබව පෙනෙනවා. ඒත්, ඒ කිරි
නරක්වෙලා වගේ.
සමහරවිට ඔවුන් කිරි නිසිලෙස පැස්ටරීකරණය කර නැතුවා වෙන්නඇති. අපි මීට පෙර ඔවුන්ගේ චොකලට් කිරි රසබැලූ අවස්ථාවේ අත්දැකීමත් මෙවැනියි. කණගාටුයි.
3. කොත්මලේ ලීටරය රු. 230යි
මෙය තවත් අතුරු නිෂ්පාදකයකු විසින් ගෙන එන ඇතැමුන් ලොල්වූ අයිස්ක්‍රීම් වර්ගයක්. කඳුකරයේ පිහිටි ඔවුන්ගේ කදිම කිරි ගොවිපළ මෑතදී කාගිල්ස් විසින් මිළදීගත්තා. ඒ සමගම ඔවුන්ගේ ප්‍රමිතීන් පහළ වැටුණුබවත් කියනවා. ඔවුන්ගේ මිළෙන් ඉහළ පෙකන්, බෙරීස් ආදී අයිස්ක්‍රීම් වර්ග ඉතා ජනප්‍රියයි.
අප රස බැලූ වැනිලා අයිස්ක්‍රීම් උකුබවින් හා ක්‍රීම් ගතියෙන් හොඳයි. ඒත්, වැනිලා රස මදි. එය මඳක් දියවූවිට යන්තමින් පාප්ප රසක් ආවා. නරක නැතිවුණත්, හොඳත් නැති නිසා එය මධ්‍යම මට්ටමටයි වැටුණේ.
2. එලිෆන්ට් හවුස් ලීටරය රු. 220යි
බොහෝ කොළඹ වැසියන්ට අයිස්ක්‍රීම් කිව්වාම ඉතින් එලිෆන්ට්හවුස් තමයි. ඒත්, අපේ රසවිඳුමේදී එයට හිමිවුණේ දෙවන තැන. එය හොඳ වැනිලා හා කිරි රසින් යුක්තයි. සුමුදුයි. ශක්තිමත් වැනිලා රස නිසා එය හොඳ කේක් පිටිමුසුවක් වගේ. අනෙක් වර්ගවල ඇටකටු සුද වගේ නොවෙයි එහි ඇත්දළ වර්ණයත් රුචියවඩනසුළුයි. එහි සැහැල්ලුබවට ඇතැමෙක් ප්‍රියකරන්න පුළුවන්. ඒත්, අපනම් සිතන්නේ එහි කිරි ගතිය හා උකු ගතිය එහි තරගකරුවාට සාපේක්ෂව මදි කියායි.
1. කාගිල්ස් මැජික් ලීටරය රු. 220යි,
මේ තමයි හොඳම අයිස්ක්‍රීම් වර්ගය. කීල්ස් අයිස්ක්‍රීම්වලට වඩා මඳක් ඉහළින් ඇති එය අප රස බැලූ වර්ග අතරින් සමබරම එක. ක්‍රීම් ගතියයි. ඒත්, පාප්ප ගතියක් නැහැ. සුමුදුයි. වෙනත් ටොපිංස් වර්ගවලට හොඳ පදනමක්. මෙයත් සාමාන්‍ය සුපිරිවෙළඳසල අයිස්ක්‍රීම් වර්ගයක්ම තමයි. අතිවිශිෂ්ට රසයක් නොවෙයි. ඒත්, සියුම් රස නිසා කාගිල්ස් මැජික් පළමු තැනට පත්වුණා. කාගිල්ස් නිෂ්පාදන ගැන අපි කලින් තරමක් විවේචනාත්මකවුණත් වැනිලා අයිස්ක්‍රීම් නම් මේ රසවිඳුමේ ජයග්‍රාහකයා වුණා.
