අපිට ජීවිතේදි යාළුවො හම්බ වෙන්නෙ එක එක විදිහට. වැඩි දෙනෙකුට ඉන්නෙ ගෙදර අහළ පහළදි, ඉස්කෝලෙදි, ටියුෂන් ක්ලාස් එකේදි, කැම්පස් එකේදි, ඔෆිස් එකේදි හම්බුණ යාළුවො. නැත්තං ඔයිට වැඩිය අහම්බෙන් හම්බුණු යාළුවොත් හොඳ ම යාළුවො වෙන වෙලාවල් තියනවා. සමහරුන්ට පෙර පාසලේදි ළඟ වාඩි වෙලා හිටපු යාළුවා වයසට යනකනුත් හොඳ ම යාළුවා වෙනවා. තවත් සමහරුන්ට හොඳ ම යාළුවා හම්බ වෙන්නෙ ජීවිතෙන් බාගෙකටත් වඩා ගෙවිල ගියාට පස්සෙ. ඉතින් යාළුකමේ හොඳ නරක තීරණේ කරන්නෙ කොච්චර කාලයක් යාළුකම පැවතුණා ද කියන එක නෙවෙයි බව තේරෙනව නේ..
යාළුවො ඉන්න ඕන අපේ ජීවිතේ පහසු කරන්න, සැහැල්ලු කරන්න මිසක් ජීවිතේ තවත් අමාරු කරන්න නෙවෙයි. හැබැයි සමහර යාළුකම් අපේ මනසට වදයක් වෙන වෙලාවල් එනවා. ඇත්තට ම මේ යාළුකම සෞඛ්ය සම්පන්න එකක් ද කියල එහෙම වෙලාවට හිතල බලන්න ඕන. අපි හිතන්නෙ ජීවිතේට වැඩිපුර ම ප්රශ්න ඇති කරන්නෙ ප්රේම සම්බන්ධකම් කියල නේ. හැබැයි යාළු මිත්ර සම්බන්ධකම් හින්දත් මිනිස්සු අතරෙ ලොකු ප්රශ්න ඇති වෙනවා.
යාළුවෙක් අතින් අත්වැරදීම් වෙන එක සාමාන්ය දෙයක්. ඒත් දිගින් දිගට ම කෙනෙක් අතින් ඔයාට මානසිකව හිරිහැර වෙන දේවල් සිද්ධ වෙනව නං, ඔයාගෙ ම යහපත පිණිස ඔහු හෝ ඇය එක්ක තියන යාළුකම නවත්තන්න කාලේ හරි. ඒකට උදාහරණ තමයි මේ පහළ තියන ලක්ෂණ..
1 ජජ් කරනව නං
යාළුවෙක් කියන්නෙ ඔයාට ඔයා වෙන්න ඉඩ දෙන කෙනෙක්. එයා ඔයා ආස දේවල් හෙළා දකිනව නං, ඔයාගෙ තීරණ ජජ් කරනව නං, ඔයාව බලෙන් වෙනස් කරන්න හදනව නං, එයා කැමති දේවල් ඔයා ලවා කරවගන්න හදනව නං, ඒ යාළුකම ගැන නැවත හිතා බලන්න. ඒ වෙනුවට ඔයා කැමති විදිහට ඔයාට ඉන්න දෙන එක තමයි හොඳ යාළුවෙක් කරන්න ඕන දේ.
2 වැරදිකාරයෙක් කරන්න හදනව නං
කරපු හෝ නොකරපු ඕන ම දේකට ඔයාව ගිල්ටි කරන්න යාළුවෙක් උත්සාහ කරනව නං, ඒක නරක තත්ත්වයක්. ඔයා අතින් වුණ හෝ නොවුණ වරදක් ගැන පුන පුනා කිය කියා ඔයා ඒකට වග කියන්න ඕන කියල ඔයාට ඒත්තු ගන්නලා ඔයාව පහතට දාන්න හදනව නං, එහෙම අයගෙන් ඈත් වෙන්න. එයා ඔයාගෙ මානසික සෞඛ්යයට තර්ජනයක්!
3 සීමාව පනිනව නං
අපි හැමෝටම සීමා තියනවා. කෙනෙක් අපිට ලං වෙන්න ඕන ප්රමාණය ගැන අදහසක් අපි හැමෝටම තියනවා. ඒ සීමාවලට ගරු කරන එක ආචාර ධර්මයක්. කවුරු හරි ඔයාගෙ සීමාව පනින්න උත්සාහ කරනව නං, බලහත්කාරෙන් පෞද්ගලිකත්වයට ඇඟිලි ගහන්න එනව නං, ඒක හොඳ ලකුණක් නෙවෙයි.
4 සතුටේ දී සතුටු වෙන්නෙ නැත්තං
ඔයාට කරදරයක්, දුකක් ආපු වෙලාවකදි යාළුවා මඟ ඇරල යනව නං, නැත්තං එයා ඒ ගැන හොරෙන් සතුටු වෙන බව දැනෙනව නං, වහා ම ඒ යාළුකමෙන් මිදෙන්න. කෙනෙකුගේ දුකේදි දුක් වෙන එක වගේ ම සතුටෙදි සතුටු වෙන එකත් හැබෑ යාළුවෙකුගේ ලක්ෂණයක්. එයාට ඔයාගෙ ජීවිතේ සතුටු මොහොතකදි, ජයග්රහණයකදි සතුටු වෙන්න බැරි නං, ඒ වෙනුවට එයා ඉරිසියා කරනව කියල දැනෙනව නං, එහෙම අයගෙන් ඈත් වෙන එක ඇඟට ගුණයි.
5 විශ්වාසය රකින්නෙ නැත්තං
ඕන දේකට විශ්වාස කරන්න පුළුවන් යාළුවෙක් කියන්නෙ ජීවිතේට ලොකු වටිනාකමක්. ඔයා කරන දෙයක් ගැන යාළුවට කියන්න කලින් දෙපාරක් හිතන්න සිද්ධ වෙනව නං, එයා විශ්වාසය රකියි ද කියල ෂුවර් නෑ වගේ නං, ඒක හොඳ යාළුකමක් කියල කියන්න බෑ. ඇත්ත යාළුවෙක් කියන්නෙ ඔයා නැති තැන ඔයා ගැන නරක දේවල් කියන කෙනෙක් නෙමෙයි, ඔයා නැති තැන ඔයා ගැන හොඳ දේවල් කියන කෙනෙක්.
6 පාවිච්චි කරනව නං
සමහර මිනිස්සු එයාලගෙ වුවමනා එපාකම් ඉෂ්ට කරගන්න හීන්සීරුවේ අනෙක් අයව පාවිච්චි කරනවා. එයාල මේක කරන්නෙ දැනෙන නොදැනෙන ගාණට. එක්කො යාප්පුවෙන්. නැත්තං සද්දෙ දාලා. මේ කොයි විදිහට කළත් ඔයා පාවිච්චි වෙනවා වගේ දැනුණ මුල් ම මොහොතෙ ම ඒකට විරුද්ධ වෙන්න. ඒ කෙනා කොයි තරම් හොඳ යාළුවෙක් වෙලා හිටියත් කමක් නෑ. ඔයාගෙ ආත්ම ගෞරවය ඊට වඩා වටින බව මතක තියාගන්න.
7 පීස් ඔෆ් මයින්ඩ් නැති කරනව නං
මොන ජාතියෙ සම්බන්ධයක් වුණත් ඔයාගෙ peace of mind නැති කරන්න තරම් වටින්නෙ නෑ. යාළුකම් විශේෂයි. ඒ යාළුකම ඔයාගෙ මනසට හිරිහැරයක් නං, මතක් වෙද්දිත් කරදරයි නං, කොයි වෙලෙත් මොකක් හරි ප්රශ්නයක් ඇති කරගත්ත ගමන් නං, ඒකෙන් ඈත් වෙන්න. ඒ වෙනුවෙන් කාලය, ශ්රමය, මතකය වැය කිරීමෙන් කාටවත් ප්රයෝජනයක් නෑ.
