“අන්න විසි කළා! මෝඩයා,
අපරාදෙ වැටකොළු ලෙලි ටික. රහට හදල ගන්න තිබ්බනෙ”
“මොකක්?
ලෙලි?
රහට හදන්න?
මම කොහොමද අම්මෙ, ඕවා දන්නෙ. එක්කො විසි කරන්න කලින් කියන්න ඕන”
“ඔව් ඔව්, උඹල දන්නෙ නෑ. අනික උඔල ගෑනු ගෙනැල්ල කුස්සි බාර දෙද්දි මේ කෑම තියෙන එකකුත් නෑ.
ඒකට කමක් නෑ, වැඩක් නැත්තං, ඔතනින් වාඩි වෙලා අහගන්නකො. අපි නැති කාලෙක, පොඩි එකෙක්ටවත් හදල දෙන්න”
1. අළු කෙසෙල් ලෙලි සම්බෝල
Image: මුහුණු පොතේ මුළුතැන්ගෙය Recipes Page
වැටකොළු ලෙලි හදන හැටි කියන්න කලින්, මම කියන්නම්කො අළු කෙහෙල් ලෙලි හදන හැටි. මොකද ඒක නිතර දෙවේලෙ ගෙදර හැදෙනවනෙ.
අළු කෙහෙල් උයන්න කලින්, පොතු ගහල ලෑස්ති කරනවනේ. අන්න ඒ පොතු ටික අරගෙන, හොඳට හෝදල කරල, හීනියට ලියාගන්නයි තියෙන්නෙ. ඊට පස්සෙ ගැඹුරු තෙලේ බැදගන්න ඕන. ඒ අතරට තක්කාලි, බී ලූණු, අමු මිරිස්, උම්බලකඩ දාපු සම්බෝලයකුත් හදා ගන්න ඕන. බැදපු අළු කෙහෙල් ලෙලි ටිකේ තෙල් බේරුනාට පස්සෙ සම්බෝලෙට, දාලා කලවම් කරල ගත්ත නම් හරි. හැබැයි මතක ඇතුව, හොඳ හැටි ඇඹුල තියෙන්න දෙහි ගෙඩි 1ක්, 2ක් වත් දාන්න.
2. කොස් වහලු කට්ලට්
Image: Deshaya
මේවා කියද්දි උඹලා හිනාවෙයි. ඒත් හදල දෙන්න ඕන, තලු මර මර දෙසා බාන හැටි බලන්න.
ඔය හරකුන්ට දාන කොස් වහලු තියෙනව නේ. කටු පොත්ත රැහැලා, ගොරක දාලා, හොඳ..ට තම්බන්න. තම්බල වතුර පෙරෙන්න තියල පොඩි පොඩි කෑලි වලට කපල, හෝදන්න. ඊට පස්සෙ ඒක එහෙම තියල, තාච්චියකට තෙල් ටිකක් දාලා ලූණු, රම්පෙ කරපිංච ටිකක් ලාවට බැද ගන්න ඕන. බැදුම රන්වන් පාට වේගෙන එද්දි, අමු මිරිස්, කෑලි මිරිස්, කූනිස්සො ටිකක් එහෙමත් එකතු කරල, රස පදමට ලුණු, ගම්මිරිස් ටිකක් දාගත්ත නම් හරි. අන්තිමටම, තියෙන්නෙ කොස් වහලු ටිකයි, තම්බල පොඩි කරගත්තු අල ටිකකුයි එකතු කරල මිශුණය හදාගන්න. ඊට පස්සෙ ඉතින්, සාමාන්‍ය විදියට කට්ලට් ටික බැද ගන්න බැරියැ.
3. දෙහි ආනම
Image: Shiki Food
මිරිකපු දෙහි ලෙල්ලෙන් පවා රස කෑම හදන්න පුළුවන්. දන්නෙ නෑනෙ.
එහෙනම් ඒකත් අහගන්නකො. මුලින්ම දෙහි ලෙලි හීනියට කපල ලුණු වතුරෙ තම්බ ගන්න ඕන. ඊට පස්සෙ මැටි ඇතිළියකට තෙල් ටිකක් ලිපේ තියල අබ පොඩ්ඩක් බැද ගන්න. අබ ටික බැදීගෙන එද්දි, රම්පෙ කරපිංච, කුරුඳු, උළු හාල්, සූදුරු, ලූණු, සුදු ළුෑණු, අමු මිරිස්, වේලපු මිරිස් දාලා තෙල් දැමුමක් හදාගෙන, ඒකට මිටි කිරි, අමු තුනපහ, කහ, මිරිස් කුඩු එහෙමත් එකතු කරන්න. ඒ වෙලාවෙම වගේ ලුණුත් බැලුව නම් තමයි හොඳ. කොහොම හරි අන්තිමට අර දෙහි කෑලි ටික දාලා, හොද්ද පොඩ්ඩක් හිඳෙන්න ඇරලා, සීනි චුට්ටකුත් එකතු කරල බා ගත්ත නම්…
පාන් කන්න කියාපු මාළුව!
4. පොලොස් සොසේජස්
Image: මුහුණු පොතේ මුළුතැන්ගෙය Recipes Page
විසි කරන දෙයකින් නොහැදුවට මේකත් මරු කෑමක්. කරන්න තියෙන්නෙ, පොලොස් කෑලි ග්‍රෑම් 500ක් වගේ අරගෙන හොඳට තම්බල, පොඩි කරගන්න එක. ඊට පස්සෙ ඒකට කඩල පිටි ග්‍රෑම් 150ක් වගෙයි, බිත්තරයකුයි දාලා කලවම් කරගන්න ඕන. ඒ අතරට තෙල් ටිකක් රත් වෙන්න තියල රම්පෙ කරපිංච, මිරිස්, ගම්මිරිස් ටිකක් තෙල් දාගෙන, පොලොස් මිශ්‍රණයත් ඒකටම දාලා ගත්ත නම් හරි. හැබැයි, බාන්න කලින් ලුණු බලන්නත් මතක තියාගන්න ඕන. අන්තිමටම මේ මිශ්‍රණයෙන් ටික ටික අරගෙන රෙදි කෑලි වලට දාලා සොසේජස් හැඩේට හදල, ටොපිය වගේ දෙපැත්ත ගැට ගහල, හුමාලයෙන් තම්බගන්න තියෙන්නෙ.
ඊට පස්සෙ ඉතින් ඔය සොසේජස් වලින් දාන ඕන වැඩක් මේකෙනුත් දැම්මහැකි. බැදල නම් එහෙමයි, ඩෙවිල් නම් එහෙමයි…
5. වැටකොළු ලෙලි ඩෙවිල්
ආ… ඔන්න දැන් අහගන්නකො වැටකොළු ලෙලි වැඩේ.
මුලින්ම කරන්න තියෙන්නෙ වැටකොළු ලෙලි ටික හෝදල ඇඟිලි පුරුකක සයිස් එකට විතර කපාගන්න එක. ඊට පස්සෙ තෙල් ටිකක් ලිපේ තියල අබ, රම්පෙ කරපිංච, ලූණු, සුදු ලූණු දාලා ලාවට කර කරගන්න. ඒ එක්කම කෑලි මිරිසුයි, ලුණුයිත් දැම්ම නම් හොඳයි. ඒ ටික බැදී ගෙන එද්දි කපා ගත්තු වැටකොළු ලෙලි ටික දාලා පොඩ්ඩක් තෙල් අල්ලන්න දෙන්න. අන්තිමට මාළු මිරිස්, කැරට් කෑලි ටිකකුයි, ඕනම නම් බිත්තරයකුත් එකතු කරල බාගන්න පුළුවන්. ඔය අතරට ඉතින් රස වැඩි වෙන්න, ඔය සෝයා සෝස්, රස කාරක මොනව හරි එකතු කලත් කමක් නෑ, හොඳද.
දැන් ඉතින්, ඔළුව වැනුවට මම දන්නව ඔය කියපුවැයින් එකකට දෙකකට වැඩිය ඔළුවෙ නෑ කියල. ඒ නිසා ඊළඟ දවසෙ ඇවිල්ල මම හදද්දි බලා ගෙන ඉන්න. නැත්නම් ඉතින් මේ කෑම ගැන තියෙන ආසාව අත්ඇර ගන්න තමයි වෙන්නෙ.
