මස් මාළු හැමදාම නෑනේ. අතේ සතේ නැතිදාට කරවල හාල්මැස්සො ටිකක් කන්න වෙනවනේ. මොකද ඔය ඇති නැති කාටත් අමාරු කාල එනවනෙ?
වැඩේ කියන්නෙ එහෙමයි කියල අපේ උන් සම්බෝලයි බතුයි කන්නෙත් නෑනෙ. කටට රහට එළවළුවක් හැදුවත්, ගොඩ දෙනෙක්ට නම් ප්‍රෝටීන් මොනව හරි ඕනමයි. ඒකත් හැමදාම දෙන විදියට දීලත් බෑ. වෙනස් විදියකට දුන්නොත් තමයි පිරියක් ඇතුව කන්නෙ. නැත්නම් ඔහේ කාලා දානව, ඇඟට අල්ලන්නෙත් නෑ, හදපු කෙනාට සතුටකුත් නෑ…
අන්න ඒ නිසයි අපි කල්පනා කළේ අළුත් විදියකට ප්‍රෝටීන් ටිකක් හදාගන්න පුළුවන් ක්‍රම ටිකක් ඔයාලට කියන්න. ලොකු වියදමක් නැතුව, කුස්සිය අහල පහළ තියෙන දේවල්වලින්, කටට රහට හදාගන්න. ඊට පස්සෙ බත් එකත් එක්ක තලු මර මර රස බලන්න. ඒ විතරක් නෙවෙයි හදිස්සියකදි ඔය පොඩි, කෑම වේලකට වුණත් පිළිගන්වන්න පුළුවන්නෙ, මේ සුපිරි බිත්තර ප්‍රඩක්ට්ස් 5 නේද?
1. Egg Bhurji
බිත්තර කෝම්පිට්ටු කාලා තියද?
නෑනේ, එහෙනම් අහගන්නකො හදන විදිය. ගන්න බිත්තර 5ක් විතර අරගෙන, කඩල, භාජනයකට දාලා හොඳට ගහගන්න. ඒ අතරට රස පදම බලල ලුණු, ගම්මිරිස් දාන්නත් අමතක කරන්න එපා. ඊට පස්සෙ බී ලූණු ගෙඩියක්, තක්කාලි ගෙඩියක්, මාළු මිරිස් කරල් 2ක්, අමුමිරිස් කරල් 2ක්, කොත්තමල්ලි කොළ අහුරක් අරගෙන හීනියට ලියල බිත්තර එකටම දාලා හොඳට කලවම් කරගන්න. අන්තිමට බටර් මේස හැඳි 3ක් 4ක් පෑන් එකකට දාලා, ඒක ලාවට දියාරු වීගෙන එනකොට මිශ්‍රණය එකතු කරල හොඳ…ට කලවම් කරගන්න තියෙන්නෙ. දන්නවනෙ, බිත්තර කැරලි කැරලි හිටින විදියට, හොඳද.
හැදුවට පස්සෙ ඉතින්, පාන් කනව නම් එහෙමයි, පිරවුමකට ගන්නව නම් එහෙමයි, ටිකක් සැරට හදාගත්තොත් බයිට් එකකට වුණත් නරකම නෑ.
2. Egg Muffin
මේකටත් බිත්තර 5ක් විතර ගන්නකො. අරගෙන ලුණු ගම්මිරිස් දාලා හොඳට ගහගන්න. ඊට පස්සෙ හීනියට ලියා ගත්තු කුකින් චීස් මේස හැඳි 3,4ක් සොසේජස් කරල් 3,4ක් තක්කාලි ගෙඩි බාගයක්, ලූණු කොළ අහුරක් එකතු කරල කලවම් කරගන්න. ඒ අතරට මෆින් කප් ටිකක් අරගෙන බටර් ටිකක් ගාලා ලෑස්ති කරගන්නත් ඕන. අන්තිමට කප්වලට පුරවල සෙල්සියස් 180ට විනාඩි 20ක් 25ක් බේක් කරගන්න තියෙන්නෙ. හැබැයි කප්වලට පුරවද්දි මතක තියාගන්න කප් එකකින් ⅓කට වඩා පුරවන්න එපා. මොකද බේක් වෙද්දි උතුරන්න ඉඩ තියෙනව.
කොහොම වුණත් ඉතින් මේකත් පොඩි බඩගින්නට නම් සුපර්.
3. Frittata
ෆ්‍රට්ටාටා හදන්න, බිත්තර ගන්න කලින් පෑන් එකකට තෙල් ටිකක් ලිපේ තියල ඉන්න. මේස හැඳි 3,4ක් විතර. ඊට පස්සෙ පොඩියට කපා ගත්තු සුදු ළූණු, ළූණු, නිවිති කොළ, තක්කාලි, තම්බපු අල කෑලි තෙලට දාලා තෙම්පරාදුවක් හදාගන්න. ෆ්‍රීසර් එකේ මස් මාළු, සොසේජස් මොනව හරි තිබ්බොත් ආස හැටියට ඒවත් එකතු කරගන්න. හැබැයි ලුණු, මිරිස් පදම බලන්න අමතක කරන්න එපා. තෙම්පරාදුව සුවඳ ගගහ පදමට එද්දි ලිපෙන් බාලා බිත්තර 8කුයි ලුණු, ගම්මිරිස් ටිකකුයි එකතු කරල හොඳට කලවම් කරගන්න. අන්තිමට බේකින්ග් තැටියක බටර් ටිකක් ගාලා, මිශ්‍රණය අතුරල හැඩයට හදල සෙල්සියස් 160 විතර, විනාඩි 20ක් 25ක් බේක් කරගත්ත නම් හරි.
පාන් නැත්නම් නිකම් වුනත් කන්න පුලුවන් බයිට් එක.
4. Scotch Egg
ෂප්පේ… මතක් වෙද්දිත් කටට කෙළ උනන කෑමක්. හදන්නත් ඒ හැටි අමාරු නෑ. කරන්න තියෙන්නෙ ආස කරන මස් ජාතියක් අරගෙන කටු අයින් කරල හොඳට අඹර ගන්න එක. ඊට පස්සෙ ඒකට හීනියට ලියාගත්තු පාස්ලි කොළ, රස පදමට ලුණු ගම්මිරිස් එකතු කරල රොටියක් වගේ තැටියක හරි ලෑල්ලක හරි තුනී කරගන්න. ඒ රොටිය මැද්දට තම්බපු බිත්තර තියල, සම්පූර්ණයෙන්ම වැහෙන විදියට එකින් එක ඔතාගන්න. ඔතාගෙන ෆ්‍රීසර් එකේ පැයක් එක හමාරක් තියන්න ඕන. බිත්තරේ හොඳහැටි ගල් වුණාට පස්සෙ ෆ්‍රීසර් එකෙන් එළියට අරගෙන නිවෙන්න ඇරලා බිත්තර සාරු, බිස්කට් කුඩුවල තවරල ගැඹුරු තෙලේ බැදල ගන්න.
මේකෙ රස කියන්නෙ යාළු! ෆ්‍රයිඩ් රියස්, බිරියානි පිඟානකට ගේමක් නැතුව වග කිව්වහැකි.
5. Smashed Egg Toasts
තම්බපු බිත්තර නිකම් කන්න කම්මැලියිද? එහෙනම් කරන්න, මෙන්න පොඩි වෙනසක්.
තම්බපු බිත්තරේ හීනියට පොඩි කරලා මයොනීස් ටිකක් දාලා හොඳට කලවම් කරන්න. මයොනීස් නැත්නම් චීස් මොනව හරි වුණත් දාන්න පුළුවන්. දාලා ඒක පැත්තකින් තියල, පෑන් එකක පාන් පෙති දෙකක් කර කර ගන්න. පාන් පෙති දෙකත් ලාවට කරවීගෙන එද්දි ඒව උඩට චීස් පෙති හරි බටර්, මාගරින් තට්ටුවක් හරි දාලා, ඒ එක්කම වගේ මිශ්‍රණයත් ටිකක් ඝනට අතුරල ලුණු, ගම්මිරිස් කුඩු ටිකක් ඉහින්න. අන්තිමට ඉතින් සුවඳ ගහගෙන එද්දි බාලා, උණු උණුවෙම රස බලන්නයි තියෙන්නෙ.
හැබැයි එකක්, මේ කෑම කෑව වගේ නෙවෙයි, එක දිගට එන වතුර තිබහ නිවාගන්න සෑහෙන්න වතුර ප්‍රමාණයකුත් බොන්න වේවි, හොඳද.
‘ඒකට මොකද’ කියල හිතෙන යාළුවන්ට පුළුවන්, ඔයාලා දන්න මේ වගේ පොඩි පොඩි කෑම අපිට කියන්න. එතකොට අපේ අනිත් යාළුවන්ටත් ඒවා බලාගෙන ගෙදර ඉන්න ගමන් හදල, රස බලන්න බැරියැ, නේ.
