ඇත්තනෙ ඉතින්, චිකන් කරිය කනව නැත්නම් බැදල කනව එහෙමත් නැත්නම් ඉස්ටුවක් දාගෙන කනව. ඔහොම කාලා ඉතින් දවසක එපාත් වෙනවනෙ. ඊටත් ඔය පෝර්ක්, බීෆ් වගේ දෙයක් ගෙනාවොත් අනිවා කරි තමයි. එහෙමත් වෙලාවක ඉස්ටුවක් වගේ දැම්මොත් මිසක් වෙන කිසිම රසකට මේසෙට එන්නෙ නෑනෙ. වැඩිය ඕන නෑ, ඩෙවල් එකක් දාගන්නත් මාර ගේමක් දෙන්න එපැයි. ඇයි අප්පේ… ගෙනාපු බෝතලේ ෂේප් එකේ මේසෙට ගලපල, ගෙදර උන්දැලවත් කැමති කරගෙන, හොඳම යාළුවො දෙතුන් දෙනෙක්ටත් අඬ ගහගෙන, සැන්ඩි අඩුම කුඩුමත් ගෙනැල්ලා… වැඩ කෝටියයි ඉතින්.
ඇත්තටම ඊට වැඩිය ලේසි නැද්ද, තියෙන මසක් මාළුවක් ෆ්‍රිජ් එකෙන් එළියට අරගෙන රස පදම හොඳ හැටි තියෙන්න අපි ම හදාගන්න විදියක් හොයා ගත්තොත්. අඩුම තරමෙ අම්මට, බිරිඳටවත් සෙකන්ඩ් වෙන්නෙ නැතුව වැඩේ ගොඩ දාගන්න පුළුවන්නෙ.
නැතත්, දෙයියනේ කියල ගෙදර කවුරුත් නැති වෙලාවට හිතේ හැටියට කෑම ටිකක් හදාගෙන රස බලන්න වුණත් පුළුවන්.
ඉතින්… ඔන්න ඔය හේතු මත අපි කල්පනා කලා, අපේ කට්ටියට පොඩි පොඩි ට්‍රික්ස් ටිකක් කියන්න, මස් ටිකක් සෙනිකව, කටට රහට හදාගන්න. එහෙනම්… බලන්නකො, ගෙදර ඉන්න වෙලාවට මේවයින් එකක් දෙකක් හදලා…
තලුමරමර බඩ පිරෙන්න කෑම කන්න!
1. ඇඹුල් බීෆ් සම්බෝල
හරිම ලේසි වැඩක්. ඒවගේම තමයි බයිට් එකට එහෙම පංකාදු රසක්.
කරන්න තියෙන්නෙ බීෆ් කෑලි ඇඟිලි පුරුක් සයිස් එකට කපලා… දෙහි, ලුණු, සියඹලා, ඉඟුරු, ගම්මිරිස්, කොච්චි, අබ, එනසාල් දාලා හදාගත්තු පේස්ට් එකක පැයක් හමාරක් පදම් වෙන්න අරින එක. ඊට පස්සෙ ඒ ටික බටර් හරි මාගරින් හරි දාලා මද ගින්දරේ පෑන් ෆ්‍රයි කරන්න ඕන. ඒ අතරට හීනියට ලියාගත්තු ලූණු, අමු මිරිස්, කෑලි මිරිස්, තක්කාලි, දෙහි ටිකකුත් ලෑස්ති කරල තියාගත්ත නම්… බීෆ් ටික හරියාගෙන එද්දි ම පෑන් එකෙන් බාලා, දීසියකට දාලා කවලම් කරල ගන්නයි තියෙන්නෙ. පස්සෙ ඉතින් පදම බලල ලුණු අඩුම කුඩුම ටික දාගන්න බැරියැ.
2. ස්පයිසි චීස් චිකන්
දැන් බලනව ඇති මේ මොකක්ද බොලේ මේ කියල.
ඇත්තට ම ඒක ටිකක් අමුතු කෑමක් තමයි. අනික චීස් නැතත්, කිරි පාවිච්චි කරල වුණත් හදාගන්න පුළුවන් කෑමක්. කොහොම වුණත් මේකට, මුලින් ම කුකුල් මස් අරගෙන පොඩියට කපල හොඳට ඉරි ගහගන්න ඕන. ඊට පස්සෙ ඒක පැත්තකින් තියල, කුකින්ග් චීස් ටිකක් වැඩිපුර අරගෙන පෑන් එකක මෙළෙක් කරගන්න ගමන් ලුණු, ගම්මිරිස්, මිරිස් කුඩු, සූදුරු කුඩු හරි මහදුරු කුඩු හරි ටිකකුත් එකතු කරන්න. හදිස්සියෙවත් ඔයා ළඟ චීස් තිබ්බෙ නැත්නම් එළකිරි වුණත් ගන්න පුළුවන්. හැබැයි මතක තියාගන්න එළකිරි ගත්තොත් කෝන්ෆ්ලා ටිකකුත් එකතු කරන්න වෙනව.
එ් කෙසේ වෙතත්, අන්තිමට ඉතින් චීස් ටික තෙල් වෙන්න කලින් චිකන් ටික එකතු කරල, හොඳට දැවටෙන්න ෆ්‍රයි කරගත්තෙ නැත්නම් නම්… කාලා හමාරයි හොඳේ.
3. පෝර්ක් හින්දුම
පාන්, රොටි වගේම බත් කන්න වුණත් සුපිරි මස් එක. ඒ විතරක් නෙවෙයි රත් කර කර දවස් ගාණක් තියාගන්නත් පුළුවන්.
මේක හදාගන්න ඕන කරන්නෙ ඇඟිලි පුරුකක් සයිස් එකට කපාගත්ත පෝර්කුයි දෙහි, ලුණු, ඉඟුරු, සියඹලා, අබ පොල් බැදුම් ඇඹරුමක්, මිරිස් කුඩු, බැදපු තුනපහ වගේ ටිකකුයි තමයි. ඒ හැරුනාම විනාකිරි පොඩ්ඩක්, වතුර ටිකක් එහෙමත් ඕන වෙනව. ඒ ඔක්කොම එකතු කරගත්තට පස්සෙ ඔක්කොම එකට දාලා (වතුර නොදා) මැටි මුට්ටියක පැයක් හමාරක් පදම් වෙන්න අරින්න. පදම් වුණාටත් පස්සෙ මස් මට්ටමටම වතුර දාලා මද ගින්දරේ අඩි අල්ලනකම්ම හින්ද ගන්න. ඒකෙදි දර ලිපක් පාවිච්චි කරන්න පුළුවන් නම් වැඩේ සුපිරියටම තියෙයි.
4. පැණි චිකන්
සුප්ප ඈ… කෑවොත් වරක් අනිවා හදනවා තව වරක්!
අවංකයෙන්ම, සුපිරි චිකන් එක. හැබැයි පාන්, බනිස් වගේ එකක් එක්ක තමයි හොඳටම යන්නෙ.
විශේෂම කාරණේ තමයි මේක හදාගන්න හරිම ලේසි එක. මුලින්ම චිකන් බ්‍රෙස්ට් ටිකක් අරගෙන ඇඟිලි සයිස් එකට කූරු වගේ කපා ගන්න ඕන. ඊට පස්සෙ ඒවා ලුණු දාලා ලාවට තම්බ ගන්න ඕන. ඊටත් පස්සෙ කිතුල් පැණි ටිකක් අරගෙන (නැතිම නම් සුගර් සිරප් වුණත් අවුලක් නෑ) ඒකට එනසාල්, කරාබු නැටි, සූදුරු හරි මහදුරු හරි තලල අරගෙන එකතු කරලා ගම්මිරිස් චුට්ටකුත් දාන්න. දාලා මැටි මුට්ටියක චිකන් ටිකත් එක්ක එකතු කරලා පුළුවන් වෙලාවක් පදම් වෙන්න අරින්න.
හැබැයි එකක්!, පදම් වෙච්ච චිකන් නිකම් එහෙම කනව නෙවෙයි. බටර් දාලා ලාවට පෑන් ෆ්‍රයි කරල තමයි කෑමට ගන්න ඕන, හොඳද.
5. බිත්තර සොසේජස්
ඡායාරූපය: Healthy Food Recipes
හරි ෆන් වැඩක්. ඒ වගේම තමයි පොඩි අයට එහෙමත් කියාපු කෑමක්.
මේකට ගන්න ඕන අර ටිකක් මහත සොසේජස් එක. අරගෙන මේස හැන්දක මිටක් පාවිච්චි කරල ඇතුළ තරමක් හිස් කරගන්න. සාමාන්‍යයෙන් ඇඟිල්ලක මහතට විතර. ඊට පස්සෙ ඒ ටික පැත්තකින් තියල පෑන් එකට බිත්තරයක්, සොසේජස් හූරගත්ත ටික, චීස් ටිකක්, කැරට්, ලීක්ස් වගේ එළවළු තියෙනව නම් ඒවත් හීනියට ලියල දාලා, ලුණු, ගම්මරිස්, කෑලි මිරිස් එක්ක කැරලි වෙන්න හදාගන්න. අන්තිමට ඉතින් ඒ පිරවුම සොසේජස්වලට පුරවලා… ෆ්‍රයි කරගන්නයි තියෙන්නෙ. ඕන නම් ඉතින් අවන් එකේ බේක් කරගන්නත් පුළුවන්. එතනින් එහාට ඉතින්… කියන්න ඕන නෑනෙ.
ඔය වගේ ඉතින් තව කෑම තොගයක් තියෙනව, ගෙදර ඉන්න වෙලාවට නිදහසේ හදල හිතේ හැටියට රස බලන්න පුළුවන්. ඒත් ඉතින් ඔක්කොම එකපාර කියන්න බෑනෙ. හැබැයි පස්සෙ දවසක තව ටිකක් කියනකම්… අපි ආසයි ඔයාලා දන්න ඔය වගේ කෑම ටිකක් අහල දැනගන්න. එතකොට අපිටත් බැරියැ නිකම් ඉන්න වෙලාවට හදල, රස බලල අපේ යාළුවන්ටත් කියන්න!
