කොරෝනා වසංගත ව්‍යාප්තියෙන් අපිට අහිමි වුණ දේවල් බොහොමයි. සමස්තයක් විදිහට අපේ සුපුරුදු ජීවන රටාව සම්පූර්ණයෙන් ම කොරෝනා නිසා ලබා දුන්න නිවාඩු කාලෙ දි අපිට අහිමි වුණා. හැබැයි, අහිමි වුණ හුඟක් දේවල් වගේ ම, මේ නිවාඩු කාලෙ නිසා අපිට අත් වෙන යහපත් දේවලුත් තියනවා. ඉතින් සෘණාත්මක පැත්ත දිහා නොබලා, අපි ධනාත්මකව හිතමු. කළු වලාවක වුණත් රිදී ඉරක් තියනව ලු නේ. මේ තියෙන්නෙ ඇඳිරි නීති නිවාඩු කාලෙන් අපිට අත් වෙන වාසි 7ක්!
ආරක්ෂාව
අපි හැමෝම ගෙවල්වලට වෙලා ස්වයං නිරෝධායනයට ලක් වෙමින් ඉන්න ලොකු ම හේතුව තමයි හැමෝගෙම සෞඛ්‍යාරක්ෂාව. ගෙදරට වෙලා ඉන්න එකෙන් කොරෝනා වෛරසයට නිරාවරණය නොවී ඉන්න වගේ ම, හොඳ සෞඛ්‍ය පුරුදු අනුගමනය කරන්නත් අපිට පුළුවන් වෙනවා. වෛරසය පැතිරීම පාලනයට ඒ දෙක ම අත්‍යවශ්‍යයි.
සල්ලි ඉතුරුයි
එළියට යෑමක් නැති මේ දවස්වල අතේ තියන සල්ලි ටික නං ඉතුරු වෙන බව අමුතුවෙන් කියන්න දෙයක් නෑනේ. එළියෙන් කෑම, විනෝද ගමන් වගේ අවස්ථා නැති නිසා, ගෙදරට අවශ්‍ය බඩු, බෙහෙත් වගේ දේවල්වලට ඇරෙන්න වෙන දේවල්වලට වියදමක් නෑ.
පවුලේ අය එක්ක ගෙවන කාලය
වැඩට යන දවසට ආශ්‍රය කරන්න වෙලාවක් නොලැබෙන පවුලේ උදවිය ඔන්න මේ ගෙදර ඉන්න දවස්වල හොඳට ආශ්‍රය කරන්න ලැබෙනවා ඇති. සුපුරුදු දින චර්යාවෙන් මිදුණ මේ ටිකේ, ඒ අය වෙනුවෙන් කාලය වෙන් කරන්න හොඳට ම අවස්ථාව තියනවා. නිකං කතා කර කර ඉන්න එක ඇරුණම, කට්ටිය එක්ක එකතු වෙලා කරන්න පුළුවන් ක්‍රියාකාරකමක යෙදෙන්නත් අමතක කරන්න එපා.
ඔබත් එක්ක ම ගෙවන කාලය
පවුලේ අය එක්ක කාලය ගෙවනවා වගේ ම, ඔබට ඔබ එක්ක ම ඉන්නත් වෙලාව වෙන් කරගන්න මේ දිනවල පුළුවන්. ඔෆිස් යන දවස්වල කරන්න ඕනෑකම තිබුණ, ඒත් වෙලාවක් නොතිබුණ දේවල් මතක් කරලා, ඒවා එකින් එක කරන්න පටන්ගන්න. කාමරේ අස් කරන එක, කැඩුණු බිඳුණු දෙයක් හදන එක, අලුත් විනෝදාංශයක් පටන්ගන්න එක වගේ ඕන ම දෙයක්.
ඒ වගේමයි අලුත් භාෂාවක් කතා කරන්න, සංගීත භාණ්ඩයක් වාදනය කරන්න වගේ අලුතෙන් මොනාහරි ඉගෙනගන්න කැමති අයට ඕන තරම් ඔන්ලයින් කෝසස්, ඔන්ලයින් ගෘප්‍ස්‌ එහෙම අන්තර්ජාලයේ තියනවා. ඒවයින් ප්‍රයෝජන ගන්නත් පුළුවන්. ඒ විතරකුත් නෙමෙයි. ඊළඟ ලයිෆ් ගෝල් එක, ට්‍රිප් එක, බිස්නස් එක එහෙම ප්ලෑන් කරන්නත් මේ කාලෙ පාවිච්චි කරන්න.
රාජකාරි ආතතියෙන් තොරයි
හැම රස්සාවක ම වගකීම් කියල කොටසක් තියන නිසා මානසික ආතතිය කියන්නෙ කාර්යාලවල වැඩ කරන අය අතරෙ සුලබ දෙයක්. සමහර වෙලාවට අපි ස්ට්‍රෙස් වෙන්නෙ අපි එක්ක ම වැඩ කරන්න අනෙක් අය නිසා. ඉතින් ගෙදර ඉඳන් රාජකාරි කරන මේ දවස්වල ඒ ආතතියෙන් තොරව සුවපහසුවෙන් වැඩ කරන්න අපි හැමෝට ම ඉඩ ලැබෙනවා.
ගෙදර කෑම
ගෙදර හදන කෑම කියන්නෙ අපි කවුරු කවුරුත් ආස කරන දෙයක්. ආදරෙත් එක්ක හදන නිසා ගෙදර හදන කෑමවල රස වැඩියි ලු නේ. ඒ විතරක් ද, වසවිසෙනුත් තොරයි. රස ගුණ වගේ ම, කෑම උයනකොට, කනකොට එහෙම ගෙදර කට්ටිය ම එකතු වෙන්නත් පුළුවන් නිසා, ගෙදර හදන කෑම කියන්නෙ ටිකක් විශේෂ දෙයක්. ඒ නිසා ගෙදර කෑමවල රස විඳින්න ලැබෙන එකත් ඇඳිරි නීති නිවාඩුවේ හම්බුණ හොඳ චාන්ස් එකක්.
කඩ කෑම ඕන නං..
හදිස්සියේවත් කඩේකින් කන්න හිතුණොත්, දැන් ඔබේ ළඟට ම කෑම ගෙනත් දෙන්න ලෑස්ති රෙස්ටොරන්ට් තොගයක් ම කොළඹ අවට තියනවා. හැබැයි ඉතින් එළියෙන් කෑම ගෙන්නගෙන කන්න කලින්, මෙන්න මේ යහපත් සෞඛ්‍ය පුරුදු ටිකත් අනුගමනය කරන්න අමතක කරන්න එපා.
