මේ පාර ඔන්න ලොකු ලොකු කෑම වෙනුවට ලේසියෙන් හදන්න පුලුවන් පොඩි පොඩි කෑම ටිකක්. බලන්න.. ඔය නිකම් ඉන්න ගමන් පොඩ්ඩක් හදලා කරලා, රස කොහොමද කියලා!
1. කොහිල කට්ලට්
මේකෙදි අල සහ සැමන් දෙකම වෙනුවට තමයි කොහිල පාවිච්චි කරන්නෙ. ඒ නිසා මුලින්ම කොහිල අල, ඇඟිලි පුරුකක් සයිස් එකට කපාගන්න. ඊට පස්සෙ කහ, ලුණු දාලා හොඳහැටි තම්බගන්න. තම්බලා ඒකෙන් ටිකක් වෙන්කරලා අරගෙන වතුර පෙරෙන්න දාන්න. අනිත් ටිකට තව වතුර දාලා බෙරි වෙන ගානටම තම්බ ගන්න. අන්තිමටම අර මුලින් බාපු ටික හීනියට ලියලා.. පෑන් එකකට තෙල් ටිකක් රත්වෙන්න තියලා කෑලිමිරිස්, ගම්මිරිස්, ලුණු, කොච්චි, සුදුලූණූ ඇඹරුමක් පදමටම දාලා, කරවෙන්න ඇරලා ගන්න. අරගෙන ඒකත් එක්ක අර බෙරි වෙන ගානට තම්බපු කොහිල අල ටික දාලා අතින් හොඳට පොඩි කරන්න. ඒ පොඩි කරද්දි බටර්, රස පදමට ගම්මිරිස්, ලුණු, ලූණූ, අමුමිරිස් අඩුම කුඩුම අනිවා දාන්න..
ඊට පස්සෙ ඉතින් බිත්තර සාරුවල දවටලා, පාන් කුඩුවලත් දවටලා බැදලා ගන්නයි තියෙන්නෙ.
2. රටඉඳි අච්චාරු
රටඉඳි කිව්වට මේකට මුද්දරස්පලම් එහෙමත් දානවා. කොහොමහරි වැඩේ ලේසියි. මුලින්ම රටඉඳි, මුද්දරස්පලම් උණු වතුරෙන් හෝදන්න. හෝදලා වතුර පෙරෙන්න ඇරලා රටඉඳි පලලා ඇට අයින් කරගන්න. ඊට පස්සේ.. මැටි ඇතිලියකට ඒ ටික දාලා විනාකිරි, දෙහි ඇඹුල්, මිරිස් කුඩු, ගම්මිරිස් කුඩු, එනසාල්, කරාබු කුඩු එක්ක වැනිලා චුට්ටකුත් දාලා.. රස පදම බලලා දුඹුරු සීනිත් දාලා අතින් අනන්නයි තියෙන්නෙ හැබැයි පොඩි නොවෙන්න ඈ.. වැඩේ ඉවරවෙලා වරුවක් විතර පැහෙන්න තියලා..
වැඩේට බහින්නකො.
3. ඉඟුරු, මුද්දරස්පලම් පුඩිම්
එච්චර හිතුවෙ නැතිවුනාට මාර ටේස්ට් ඩෙසට් එකක් ඈ..
මේකට ඔ්න කරනවා මුලින්ම බිත්තර කහමද, සීනි, බටර් එකට දාලා හොඳට ගහලා හදපු මිශ්‍රණයක්. ඊට පස්සෙ ඒකට බේකින්ග් පවුඩර් සහ පාන්පිටි දදා ආයෙත් ඝනේට එනකම් ගහන්න. ඒ අතරට හදාගන්න සීනිපැණියක් උණුවෙන්න තියලා, ඒකට හීනියට ලියලා ලාවට තලපු ඉඟුරුයි, හීනියට ලියපු මුද්දරස්පලමයි දාලා සිරප් එකක්. අන්තිමට ඒ සිරප් එක දැම්මා අර පිටි මිශ්‍රණයට, හොඳට බීට් කලා, තෙල් කඩදාසියක් තියලා ප්ලේට් එකට ඇතිරුවා, ස්ටීමර් එකේ තැම්බුවා..
4. මීකිරි බොන්ඩා
උඳුපිටි, හීනියට ලියාගත්ත අමුමිරිස්, ලූණු, රම්පෙ කරපිංචා, ලුණු, ගිතෙල්.. පදම බලලා දාලා, හොඳහැටි අනලා පිටිමෝලියක් හදලා පිපෙන්න තියන්න. තියලා ඒ අතරට හදාගන්න මීකිරි, ලුණු, හීනියට තලපු ඉඟුරු, දුරු, අබ, කෝන්ෆ්ලා දාපු මිශ්‍රණයක්. කැමති නම් ඒකට හොඳ සැරට තෙල්දාපු කැරට්, ලීක්ස්, බිත්තර ටිකකුත් දාන්න පුලුවන්. කොහොමහරි අන්තිමට උඳුපිටි මිශ්‍රණයෙන් ඝනේට රොටි වගේ හදලා.. මැද්දට මීකිරි මිශ්‍රණය මදිනොකියන්න පුරවලා.. මුලු නවලා අතින් බෝල කරලා ගැඹුරු තෙලේ බැදගන්න.
ආයෙ මසාලා ටී එකක් හරි වැඩි කහට ටී එකක් එක්ක හරි.. බලන්න එපැයි!
5. හකුරු කිරි රොටි
ගන්න ඔයා කලින් දවසෙ ගෙනාපු පාන්ගෙඩිය ඉතුරු හරිය. අරගෙන.. ඒකට හාල්පිටියි, සීනියි, පොල්වතුරයි දාලා හොඳට අනලා වරු 2ක් විතර පිපෙන්න අරින්න. ඊට පස්සෙ ඒකටම දාන්න ලුණුයි, පොල් ගෙඩියක මිටි කිරියි. දාලා, ආයෙ අනලා.. තව වරු බාගයක් විතර තියෙන්න අරින්න. එහෙම තිබ්බට පස්සෙ ඔයාට පුලුවන් මේ මිශ්‍රණයෙන් වාටි නැති ආප්ප හදන්න. ඒ හදන අතරට ඔයා තව හදාගන්න ඕන හකුරු බෑයක් හිනියට ලියල අරගෙන, ඒකට හාල්පිටි මේස හැන්දකුයි, ලුණු ටිකකුයිත් දාලා ලිපේ උණු කරල හදපු දැවටුමක්. අන්න ඒ දැවටුමේ.. අර උණු උණු රොටි ගිල්ලල තියල කොහොමහරි ලා රස්නෙත් එක්කම වගේ..
බලන්න කෙහෙල් ගෙඩියකුත් කිට්ටු කරගෙන!
